काठमाडाैं । अबदेखि साउन १ गते मौद्रिक नीति पेश हुनुपर्ने व्यवस्था गर्न अर्थ समितिले सहमति जनाएको छ ।
संघीय संसदअन्तर्गतको अर्थ समितिको सोमबार (आज) बसेको बैठकमा नेपाल राष्ट्र बैंक ऐन संशोधन विधेयकमाथि दफावार छलफलका क्रममा अर्थ समितिले यस्तो निर्णय गरेको हो ।
यस व्यवस्थालाई कार्यान्वयनमा ल्याउनका लागि नेपाल राष्ट्र बैंक ऐनमा आवश्यक संशोधनको निर्णय गरिएको छ ।
यसअघि मौद्रिक नीति जारी हुने निश्चित तिथि तोकिएको थिएन, जसका कारण आर्थिक वर्ष सुरु भइसक्दा पनि बजेट कार्यान्वयन र वित्तीय क्षेत्रका नीतिगत स्पष्टतामा ढिलाइ हुने गरेको थियो । ऐन संशोधन गरी साउन १ गतेको समयसीमा तोकिएपछि आर्थिक वर्षको पहिलो दिनबाटै बजेट र मौद्रिक नीति एकसाथ कार्यान्वयनमा आउने अपेक्षा गरिएको छ ।
