काठमाडौं । पछिल्लो समय डिजिटल बैंकिङको प्रयोग बढ्दो छ । प्रविधिको विकाससँगै मोबाइल बैंकिङ, इन्टरनेट बैंकिङ, वालेट, क्यूआर लगायत प्रणालीबाट हुने कारोबार आक्रामक रुपले बढ्न थालेको हो ।

राष्ट्र बैंकअनुसार गत आर्थिक वर्षको अन्त्यसम्म मोबाइल बैंकिङ प्रयोगकर्ताको संख्या २ करोड नाघेको छ । असार मसान्तसम्म मोबाइल बैंकिङ प्रयोगकर्ताको संख्या २ करोड १३ लाख ६३ हजार ९८९ पुगेको छ । अघिल्लो आर्थिक वर्षको अन्त्यसम्म मोबाइल प्रयोगकर्ताको संख्या १ करोड ८३ लाख ७ हजार २५५ मात्र थियो एक वर्षको अवधिमा मोबाइल बैंकिङ प्रयोगकर्ताको संख्या ३० लाख ५६ हजार बढी अर्थात् १६.६९ प्रतिशतले बढेको हो ।

गत जेठ अन्त्यसम्मको तुलनामा असार अन्त्यसम्म यस्तो प्रयोगकर्ता झन्डै ३ लाख बढेका छन् । जेठ अन्त्यसम्म २ करोड १० लाख ९१ हजार जना मोबाइल बैंकिङको पहुँचमा जोडिएका थिए ।

एक वर्षको अवधिमा मोबाइल बैंकिङबाट २ करोड ८९ लाख ३ हजार ८७२ वटा कारोबार भएका छन् । अघिल्लो वर्षको सो अवधिसम्म यस्तो कारोबार २ करोड ५ लाख ६४ हजार ३०८ वटा थियो ।

यो अवधिमा मोबाइल बैंकिङमार्फत २ खर्ब ३३ अर्ब ४४ करोड रुपैयाँ बढीको भुक्तानी भएको छ । अघिल्लो वर्ष यस्तो भुक्तानी १ खर्ब ६३ अर्ब २५ करोड रुपैयाँ बढीको भएको थियो।

गत आर्थिक वर्षको अन्त्यसम्म इन्टरनेट बैंकिङ प्रयोगकर्ताको संख्या पनि १८ लाख ५६ हजार १९५ पुगेको छ। अघिल्लो वर्ष इन्टरनेट बैंकिङ प्रयोगकर्ताको संख्या १६ लाख ८४ हजार ३१० रहेको थियो।

यसैगरी गत आर्थिक वर्षको असार मसान्तसम्म इन्टरनेट बैंकिङमार्फत १५ अर्ब ५० करोड रुपैयाँ बढीको भुक्तानी भएको छ। अघिल्लो वर्ष यस्तो भुक्तानी १५ अर्ब ६३ करोड रुपैयाँ बढीको भएको थियो।

वालेट प्रयोगकर्ताको संख्या एक करोड ८९ लाख ४१ हजार नाघेको छ । एक वर्षको अवधिमा वालेटमार्फत २० अर्ब ३२ करोड रुपैयाँ भुक्तानी भएको छ । अघिल्लो वर्षको असार अन्त्यसम्म वालेट प्रयोगकर्ताको संख्या १ करोड ३६ लाख ७५ हजार ९९३ थियो भने यसमार्फत १७ अर्ब ७५ करोड भुक्तानी भएको थियो ।

डेबिट कार्ड र क्रेडिट कार्ड प्रयोगकर्ताको संख्यामा पनि उल्लेख्य वृद्धि भएको छ । असार मसान्तसम्म डेबिट कार्डको संख्या एक करोड २२ लाख ४५ हजार नाघेको छ भने क्रेडिट कार्ड प्रयोगकर्ताको संख्या २ लाख ८३ हजार ७७२ पुगेको छ । अघिल्लो वर्षको सोही अवधिमा यस्तो प्रयोगकर्ता क्रमशः एक करोड ८ लाख ५६ हजार र २ लकः ३८ हजार ७७२ थिए ।

गत आर्थिक वर्षमा डेबिट कार्डमार्फत ९० अर्ब ५४ करोड रुपैयाँको कारोबार भएको छ भने क्रेडिट कार्ड मार्फत १ अर्ब ८३ करोड रुपैयाँको कारोवार भएको राष्ट्र बैंकको तथ्यांकले देखाएको छ ।

मिती : ३ भाद्र २०८०, आईतवार १३:२१ बजे प्रकाशित