काठमाडौं । वैदेशिक रोजगार विभागले पीडितलाई क्षतिपूर्ति नदिने दुई वटा मेनपावर व्यवसायीको इजाजत पत्र (लाइसेन्स) खारेज गरेको छ । वैदेशिक रोजगारीमा पठाउने श्रमिकलाई ठगी गर्दै क्षतिपूर्ति नदिने डि स्क्वायर र डिलक्स एचआर मेनपावरको लाइसेन्स विभगले खारेज गरेको हो ।

विभागका महानिर्देशक मदन दाहालका अनुसार दुवै कम्पनीले पीडितहरूलाई करोडौं रुपैयाँ बराबरको क्षतिपूर्ति नदिएपछि इजाजतपत्र नै खारेज गरिएको हो । डि स्क्वायरले दुई जना पीडितलाई क्षतिपूर्ति दिन आनाकानी गर्दै आएका थियो ।त्यस्तै १५ जनाभन्दा बढी पीडितलाई क्षतिपूर्ति नदिएकोले डिलक्सको समेत इजाजतपत्र खारेज गरिएको हो ।

बुधबार महानिर्देशक दाहालले इजाजतपत्र खारेज गर्ने निर्णय गरेका हुन् । वैदेशिक रोजगार ऐन २०६४ को दफा ५१ अनुसार इजाजतपत्र रद्ध गर्ने निर्णय गरेका हुन् । अब दुवै संस्थाले इजाजतपत्र खारेजीको निर्णयमाथि चित्त नबुझेमा उक्त निर्णय भएको जानकारी पाएको ३५ दिनभित्रमा श्रम मन्त्रालयमा पुनरावेदन दिन सक्ने कानुनी व्यवस्था रहेको छ । सोही आधारमा मन्त्रालयले निर्णय गर्नेछ ।

मिती : २४ श्रावण २०८०, बुधबार २०:१० बजे प्रकाशित