काठमाडौं । नबिल बैंकले गत आर्थिक वर्ष २०७९/८० मा उत्साहजनक प्रगति गरेको छ । यो बैंकले गत आर्थिक वर्षको सर्वाधिक नाफा कमाएको छ ।
गत आर्थिक वर्षको चौथो त्रैमाससम्मबैंकले ७ अर्ब ५२ करोड रुपैयाँ खुद नाफा आर्जन गरेको छ । बैंकको यो नाफा हाल सञ्चालनमा रहेका बैंकहरूमध्येकै सबैभन्दा बढी हो । अघिल्लो वर्ष बैंकले ४ अर्ब २५ करोड रुपैयाँ खुद नाफा आर्जन गरेको थियो । यो हिसाबले बैंकको नाफा ७६.८६ प्रतिशतले बढेको हो।
असार मसान्तसम्म बैंकको वितरणयोग्य मुनाफा ३ अर्ब ९६ करोड रुपैयाँ रहेको छ। बैंकको खुद ब्याज आम्दानी १०१.६३ प्रतिशतले बढेर १७ अर्ब ९८ करोड रुपैयाँ भएको छ। अघिल्लो वर्ष यही अवधिसम्म बैंकको खुद ब्याज आम्दानी ८ अर्ब ९१ करोड रुपैयाँ रहेको थियो।
बैंकको सञ्चालन मुनाफा ७५.३६ प्रतिशतले बढेर ११ अर्ब १ करोड रुपैयाँ पुगेको छ। अघिल्लो वर्ष यस्तो मुनाफा ६ अर्ब २८ करोड रुपैयाँ थियो ।
समीक्षा अवधिमा बैंकको खराब कर्जा अनुपात (एनपीएल) बढेर १.२३ प्रतिशत पुगेको छ । अघिल्लो वर्ष एनपीएल ०.६४ प्रतिशत थियो । बैंकको खराब कर्जा बढ्दा प्रोभिजनका रुपमा राख्नुपर्ने इम्पेयरमेन्ट चार्ज पनि बढेर ३ अर्ब ८८ करोड रुपैयाँ पुगेको छ । अघिल्लो वर्ष यस्तो चार्ज १ अर्ब ११ करोड रुपैयाँमा सीमित थियो।
२७ अर्ब ५ कराड करोड ६९ लाख रुपैयाँ चुक्ता पूँजी रहेको यस बैंकको जगेडा कोषमा ३१ अर्ब ३ करोड १८ लाख रुपैयाँ सञ्चित छ । बैंकले ३ खर्ब ९६ अर्ब रुपैयाँ निक्षेप संकलन गरी ३ खर्ब ३२ अर्ब रुपैयाँ कर्जा परिचालन गरेको छ ।
बैंकको प्रतिसेयर आम्दानी (ईपीएस) ४९.२५ प्रतिशत बढेर २७.८२ रुपैयाँ कायम भएको छ। अघिल्लो वर्ष ईपीएस १८.६४ रुपैयाँ थियो। पीई रेसियो २१.५४ गुणा रहेको बैंकको प्रतिसेयर नेटवर्थ २१४.६९ रुपैयाँ रहेको छ।
