बैंकहरुको ११ महिनाको नाफा ६७ अर्ब बढी : पहिलो नम्बरमा नबिल बैंक, कुन बैंकको नाफा कति ?

अर्थ सन्जाल
२ श्रावण २०८०, मंगलवार १८:२१

काठमाडौं । आर्थिक वर्ष २०७९/८० को पहिलो ११ महिनाको अवधि वाणिज्य बैंकहरुले ६७ अर्ब बढी खुद नाफा गरेका छन् । नेपाल राष्ट्र बैंकको तथ्यांक अनुसार २०७९ साउनदेखि २०८० जेठसम्मको अवधिमा २१ वटा वाणिज्य बैंकले कुल ६७ अर्ब २३ करोड खुद नाफा गरेका हुन् ।

२१ वटा वाणिज्य बैंकमध्ये नबिल बैंकले सर्वाधिक नाफा आर्जन गर्न सफल भएको छ । यस अवधिमा नबिलले ७ अर्ब ११ करोड खुद नाफा आर्जन गरेको छ । त्यसैगरी सर्वाधिक नाफा गर्ने दोस्रो नम्बरमा ग्लोबल आईएमई बैंक छ भने नेपाल इन्भेष्टमेन्ट मेगा बैंक तेस्रो स्थानमा रहेको छ । यी बैंकले क्रमश: ६ अर्ब ५० करोड र ४ अर्ब ७६ करोड खुद नाफा आर्जन गरेको छ ।

एनआईसी एसिया बैंकको चौथो स्थानमा झरेको छ । बैंकले ४ अर्ब ६३ करोड रुपैयाँ नाफा आर्जन गरेको छ । अघिल्लो महिना एनआईसी एसिया तेस्रो स्थानमा रहेको थियो । राष्ट्रिय वाणिज्य बैंकले ४ अर्ब ४७ करोड खुद नाफासहित पाँचौँ स्थानमा छ ।

यस अवधिमा सबैभन्दा कम नाफा कृषि विकास बैंकको रहेको छ । कृषि विकास बैंकले १ अर्ब ५६ करोड खुद नाफा गरेको छ ।

हेर्नुस् कुन बैंकको खुद नाफा कति ?