काठमाडौं । मलेसियामा जहाज ग्राउन्डेड भएर डेढसय जना भन्दा धेरै यत्रु अलपत्र परेको विषय छानबिन गर्न नेपाल वायुसेवा निगमले उपसमिति गठन गरेको छ । चालक दलका लागि ककपिटमा रहने सिलिन्डरमा अक्सिजनको मात्रा घटेपछि जहाज ग्राउण्डेड भएको विषयमा छानबिन गर्न निर्देशक महेश मारिताको संयोजकत्वमा निगमले मंगलबार छानबिन उपसमिति गठन गरेको हो ।

एक साताभित्र अनुसन्धान गरी प्रतिवेदन बुझाउन समितिलाई म्याद दिइएको निगमका प्रवक्ता रमेश पौडेलले जानकारी दिए । अर्का निर्देशक पोषक ज्ञवाली सदस्य रहेको समितिले अक्सिजन बोतलको प्रेसर किन ? कसरी घट्यो भन्ने अनुसन्धान गरी भविष्यमा यस्तै प्रकृतिका घटना हुन नदिन सिफारिस गर्नुपर्ने छ ।

उपसमितिलाई ‘मूल कारण विरुद्ध सुधारात्मक कारबाही सिफारिस गर्ने र यस घटनाको लागि जानाजानी कारबाही भएको खण्डमा जिम्मेवार व्यक्तिलाई सजायको कारबाही सिफारिस गर्नुपर्ने,’ कार्यादेश तोकिएको छ ।

जहाजमा चालक दलका लागि आवश्यक अक्सिजनको मात्रा अत्याधिक न्यून देखिएपछि मंगलबार बिहान नेपाली समयअनुसार ३ बजे काठमाडौंका लागि उड्नुपर्ने निगमको न्यारोबडी क्वालालम्पुरमै रोकिएको थियो । त्यस क्रममा १५२ जना यात्रु अलपत्र परेका थिए । त्यहाँको स्टेशनले एयर एसियासँग अक्सिजन मागेर प्रबन्ध गरेपछि उक्त न्यारोबडी काठमाडाैं आउँदै छ ।

मिती : २ श्रावण २०८०, मंगलवार १८:२० बजे प्रकाशित