काठमाडौं । घोराही सिमेन्ट इन्डस्ट्रीले जारी गरेको खुला गरेको आईपीओ सर्वसाधारणको अविश्वास बढेको छ । कम्पनीले जारी गरेको आईपीओमा करिब साढे २ गुणाले ओभरसब्सक्राइब्ड भइसकेको भनिए पनि फेरी म्याद थप भएसँगै चलखेल भएको सर्वसाधारणको आशंका बढेको हो ।

नेपाल धितोपत्र बोर्ड (सेबोन)को नियमअनुसार कुनै पनि कम्पनीको आईपीओमा ओभरसब्सक्राइब्ड भइसकेपछि आवेदन दिने म्याद थप गर्न पाइदैन । तर कम्पनीले भने ओभरसब्सक्राइब्ड भइसकेको भनिएको आईपीओमा अन्तिम दिन पुन: म्याद थप गर्यो । जुन कानुनविपरित छ ।

सीडीएससीका अनुसार सोमबार १२.३० बजेसम्म यो आईपीओमा ४ लाख ४५ हजार ८९० आवेदकबाट कुल १ करोड ७२ लाख ५५ हजार २५० कित्ता सेयर माग भएको छ। जुन मागभन्दा २.४९ गुणाले बढी हो।

कानुनत कुनै पनि कम्पनीको आईपीओ ५० प्रतिशतभन्दा कम सब्सक्राइब्ड भएको अवस्थामा आईपीओ नै रद्द हुन्छ। तर, ५० प्रतिशतभन्दा बढी सब्सक्राइब्ड भएको छ भने आईपीओमा म्याद थप गर्न सकिन्छ।

कम्पनीले यसरी म्याद थप्नु कानुनविपरित भएको बोर्ड अध्यक्ष रमेशकुमार हमालले बताए । यस विषयमा छानबिन गर्न कमिटि गठन छानबिन गरी कारबाही गर्न निर्देशन दिइसकेको बताए । ‘नेपाल चार्टर्ड एकाउन्टेन्ट्स संस्था (आइक्यान)को सर्टिफाइड प्राप्त एकाउन्टेन्टले भेरिफाइड गरेर पठाएपछि हामीले एप्रुभ गर्नैपर्छ नि । जनताले बुझेर लगानी गर्नुपर्छ । यदि कसैले बदमासी गरेको गुनासो आए तुरुन्त एक्सन लिन्छु । उनले भने ।’

यसअघि नै कम्पनीको आईपीओमा लगानीकर्ताहरु शंका गरेका थिए । घोराही सिमेन्टले गत जेठ ३२ गतेदेखि सर्वसाधारणका लागि आईपीओ बिक्री खुला गरेको थियो। यो आईपीओको निष्काशन बन्द छिटोमा आज असार ४ गतेसम्म आवेदन दिने व्यवस्था गरिएको थियो । तर, कम्पनीले ओभरसब्सक्राइब्ड भइसकेको आईपीओमा आवेदन दिने म्याद गरेर असार १४ गतेसम्म थप गरेको छ।

कम्पनीले म्याद थप्नुले यो आईपीओ साँच्चिकै ओभरसब्क्राइब्ड भएको हो या होइन भन्नेमा झनै शंका उब्जिएको छ। सोझासाझा लगानीकर्तालाई महँगोमा सेयर बेचेर फसाउन खोजिएको लगानीकर्ताहरु बताउँछन् ।

कम्पनीले कम्पनीले अंकित मूल्य १०० रुपैयाँमा ३३५ रुपैयाँ प्रिमियम मूल्य थपेर प्रतिकित्ता ४३५ रुपैयाँमा आईपीओ बिक्री खुला गरेको थियो । जसमा स्थानीय बासिन्दाले त विरोध जनाएर आईपीओ नभर्ने अबियाँ समेत चलाएको थियो ।

कम्पनीले कुल ६९ लाख ११ हजार ६७० कित्ता आईपीओ बिक्री खुला गरेको हो । यसमा स्थानीय, विदेशमा रहेका नेपाली श्रमिक, सामूहिक लगानी कोष र कर्मचारीलाई छुट्याएर बाँडफाँट गरेपछि बाँकी रहेको ८ लाख ७४ हजार ३८२ कित्तासमेत थपिएको थियो।

कम्पनीले आफैं करोडौँको सेयर किनेर ओभरसब्सक्राइब्ड नै नक्कली देखाएको आशंका भएको लगानीकर्ता रोहन कार्की बताउँछन् । उनी भन्छन्, ‘ओभरसब्सक्राइब्ड भइसकेको आईपीओमा म्याद थप गर्नु जरुरी हुन्छ र ? जनताले नै आईपीओ खरिद गरेको भए किन ओभरसब्सक्राइब्ड भइसक्दा पनि म्याद थप गर्नु होइन र ? त्यसैले ओभरसब्सक्राइब्ड नै नक्कली हो भन्ने मेरो आशंका हो ।’

कम्पनी आफैले खरिद गरेर जनता झुक्याउन खोजेको स्पष्ट देखिएको उनले बताए । यो विषयमा नियामकले छानबिन कराबहोई गर्नुपर्ने उनको माग छ ।

यद्यपि, कम्पनीले प्राप्त आवेदनहरु प्रमाणित गर्ने कार्य भइरहेकाले आवेदन दिने अवधि थपेर असार १४ गतेसम्म पुर्याइएको दाबी गरेको छ । तर यसअवधिमा सबै आवेदन प्रमाणित गर्दा माग अनुसार आवेदन प्राप्त भएमा भने असार १४ गते अगावै पनि आवेदन बन्द गर्न सकिने कम्पनीले बताएको छ ।

मिती : ४ असार २०८०, सोमबार १४:१४ बजे प्रकाशित