तेहरान । इरानमा सरकार विरोधी प्रदर्शनका क्रममा एक रेफ्री र एक विद्यार्थीसहित ५ सय ४४ जनाभन्दा बढी मारिएका छन् ।
फुटबल प्रशिक्षक तथा रेफ्री अमिर मोहम्मद कुहकान (२६) लाई जनवरी ३ मा नेयरिज सहरमा भएको प्रदर्शनका क्रममा प्रत्यक्ष गोली लागेको उनका साथीले बताएका बीबीसी पर्सियनले लेखेको छ । उनका साथीले भने, ‘सबैले उनलाई उनको दयालुपनका लागि चिन्थे ।
कुहकान दक्षिण(पश्चिमी फार्स प्रान्तको नेयरिजमा मारिएका उनका साथीले बताएका हुन् । साथीले घटना प्रत्यक्ष नदेखे पनि घटनास्थलमा रहेका प्रत्यक्षदर्शीहरूबाट सुनेको बताएका हुन् ।
पाँच दिनपछि विद्यार्थी रुबिना अमिनियन (२३) लाई तेहरानमा भएको प्रदर्शनका क्रममा पछाडिबाट गोली हानिएको मानवअधिकार समूहहरूले जनाएका छन् । ‘उनले सही कुराका लागि लडिन्,’ उनका काकाले सीएनएनलाई बताए । तीन मानवअधिकार समूहका अनुसार बिहीबार एउटा प्रदर्शनमा भाग लिँदै गर्दा अमिनियनलाई पछाडिबाट गोली हानिएको थियो ।
नर्वेस्थित इरान मानवअधिकार (IHRNGO) र कुर्दिश संगठन हेङ्ग (Hengaw) ले उनलाई टाउकोमा गोली लागेको बताएका छन्, जबकि कुर्दिश मानवअधिकार नेटवर्कले उनलाई पछाडिमा गोली लागेको बताएको छ । दुवै कुर्दिश समूहले उनलाई सरकारी सेनाले गोली हानेको बताएका छन् । बीबीसीले उनको मृत्युको परिस्थिति स्वतन्त्र रूपमा पुष्टि गर्न नसकेको जनाएको छ ।
२३ वर्षीया विद्यार्थी, जसको पहिलो नाम रोबिना वा ‘रौबिना’ पनि लेखिएको छ, उनले तेहरानको शरियाती टेक्निकल र भोकेशनल कलेजमा कपडा र फेसनको अध्ययन गरिरहेकी थिइन्, IHRNGO ले भनेको छ ।
