काठमाडौं । सिद्धार्थ बैंक लिमिटेड ले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ ।
बैंकले नौ महिनामा २ अर्ब १ करोड ४८ लाख रुपैयाँ खुद नाफा कमाएको जनाएको छ, जुन गत आर्थिक वर्षको सोही अवधिको तुलनामा २०.७८ प्रतिशतले बढी हो ।
अघिल्लो वर्ष सोही अवधिमा बैंकको नाफा १ अर्ब ६६ करोड ८२ लाख रुपैयाँ थियो ।
बैंकको खुद ब्याज आम्दानी सामान्य बढे पनि इम्पेयरमेन्ट चार्ज घटेका कारण नाफा बढ्न पुगेको जनाएको छ । समीक्षा अवधिमा खुद ब्याज आम्दानी ३.०४ प्रतिशत र खुद फि तथा कमिशन आम्दानी १७.४५ प्रतिशतले बढेको छ ।
कुल सञ्चालन आम्दानी ८.२५ प्रतिशतले बढ्दा सञ्चालन मुनाफा २३.४५ प्रतिशतले वृद्धि भएको छ ।
इम्पेयरमेन्ट चार्ज घटेर २ अर्ब ३ करोड ५४ लाख रुपैयाँमा सीमित भएपछि सञ्चालन मुनाफा बढेको हो ।
यस अवधिसम्म बैंकको वितरणयोग्य मुनाफा २ अर्ब ९९ करोड ९४ लाख रुपैयाँ रहेको छ भने वितरणयोग्य प्रतिसेयर आम्दानी २० रुपैयाँ ९८ पैसा पुगेको छ ।
नाफासँगै प्रतिसेयर आम्दानी पनि बढेको छ । समीक्षा अवधिमा प्रतिसेयर आम्दानी २ रुपैयाँ ४९ पैसा बढेर १७ रुपैयाँ ६२ पैसा पुगेको छ ।
चैत मसान्तसम्म प्रतिसेयर नेटवर्थ २१६ रुपैयाँ ७३ पैसा रहेको छ भने मूल्य–आम्दानी अनुपात २२.२५ गुणा रहेको छ ।
बैंकले अविमोच्य अग्राधिकार सेयर जारी गरी चुक्ता पुँजी १८ अर्ब २९ करोड रुपैयाँ पुर्याएको छ । जगेडा कोषमा १७ अर्ब २६ करोड रुपैयाँ सञ्चित रहेको छ ।
चैत मसान्तसम्म बैंकले ३ खर्ब ३ अर्ब रुपैयाँ निक्षेप संकलन गरी २ खर्ब ३० अर्ब रुपैयाँ कर्जा प्रवाह गरेको जनाएको छ ।
