काठमाडौं । नेपाल धितोपत्र बोर्डका अध्यक्ष रमेशकुमार हमालले आईपीओमा १० कित्ते नीति पुनरवलोकन गरिनुपर्ने बताएका छन् । नेपाल आर्थिक पत्रकार संघ (नाफिज) ले शुक्रबार आयोजना गरेको ‘आर्थिक मन्दीमा पूँजीबजार : सम्भावना र चुनौती’ विषयक अन्तरक्रिया कार्यक्रममा बोल्दै आईपीओमा १० कित्ते नीति पुनरावलोकन गरिनुपर्ने र यसबारे बोर्डले अध्ययन गर्ने बताएका हुन् ।

१० कित्ते नीतिले गर्दा धितोपत्र बजारको विस्तार भएको भन्दै त्यसलाई अवसरको रुपमा लिनुपर्ने र त्यसमा रहेको केही कमजोर सुधार गर्ने पक्षमा रहेको अध्यक्ष उनले बताए ।

बोर्डले सूचीकृत कम्पनीका स्वतन्त्र सञ्चालकहरुको छुट्टै योग्यता तोक्ने तयारी गरेको समेत उनले बताए । अध्यक्ष हमालले स्वतन्त्र सञ्चालकहरुको रोष्टर पनि धितोपत्र बोर्डले नै बनाउने पनि बताए ।

उनले केही दिनमै ब्रोकर मार्फत मार्जिन ट्रेडिङ सम्बन्धी नीति कार्यान्वयनमा आउने प्रतिवद्धता व्यक्त गरे ।अध्यक्ष हमालले ब्रोकरलाई समस्यामा पारेर कमिसन घटाउने निर्णय नहुने पनि स्पष्ट पारे । ब्रोकरको कमिसन घटाउदा बोर्डको कमिसन पनि घटाउने प्रतिवद्धता पनि हमालले व्यक्त गरे । अध्यक्ष हमालले हक प्रद सेयर बारे पनि नयाँ नियम ल्याउने तयारी गरिरहेक स्पष्ट पारे ।

मिती : २९ भाद्र २०८०, शुक्रबार २०:४२ बजे प्रकाशित