काठमाडौँ । ललिता निवास जग्गा प्रकरणमा मुछिएका भाटभटेनी सुपरमार्केटका सञ्चालक मीनबहादुर गुरुङको नाममा बैंक वित्तिय संस्थाहरुको २७ अर्ब बढी  ऋण रहेको पाइएको छ ।

ललिता निवास प्रकरणमा पक्राउ परेर हाल हिरासतमा रहेका व्यवसायी गुरुङले विभिन्न बैंक तथा वित्तीय संस्थाबाट लिएको २७ अर्ब रूपैयाँ ऋण मध्ये गत असार मसान्तमा तिर्नपर्ने रकम मात्रै ८ अर्ब ९३ करोड ६२ लाख रुपैयाँ रहेको पाईएको हो । विभिन्न बैंकबाट गरी अर्बोँ ऋण लिएका गुरुङ हाल थुनामा रहेकाले बैंकको रकम तिर्न ढिलाई भएको बुझिएको छ ।

सामान्य व्यवसायी हुँदै खरबौँको व्यापारिक साम्राज्य खडा गर्न सफल मीनबहादुरमाथि ललिता निवासको जग्गा हिनामिना गरेको आरोप लागेको छ । उक्त प्रकरणमा गुरुङसहित उनको परिवारको नाममा ललिता निवासको करिब ३० रोपनी जग्गा भेटिएको छ । यसअघि पनि उक्त विवादमा मीनबहादुर पक्राउ परेर छुटेका थिए । अहिले दोस्रोपटक पक्राउ परेका गुरुङमाथि सरकारी लिखत कीर्ते गरी ललिता निवासको जग्गा हडपेको आरोप लागेको छ ।

सीआईबीले गरेको अनुसन्धानका क्रममा गुरुङकी पत्नी सावित्री घले गुरुङ, छोरी कामना, छोरा कल्याण, भाइ पहलमान र भतिजी सरला गुरुङको नाममा जग्गा राख्नुको साथै भाटभटेनी डेभ्लपर्सको नाममा समेत जग्गा राखेको भेटिएको छ । जसमध्ये गुरुङले कतिपय जग्गा बैंकमा धितो राखेर ऋण लिएको पाइएको छ भने कतिपय जग्गा बेचबिखन गरेको भेटिएको छ ।

देशैभरी व्यापारिक साम्राज्य खडा गरी पायोनियर बन्न सफल मीनबहादुर लामो समयदेखि हिरासतमा छन् । हिरासतमै रहँदा उनी अस्वस्थ भए र अस्पताल पनि भरना भए । ललिता निवास जग्गा प्रकरण राष्ट्रिय चासोको विषय बनिसकेको छ भने अनुसन्धानरत रहेको यो विषयले छिट्टै टुंगो पाउने पनि बुझिँदैन । यस हिसावले उनको नाममा रहेको अरबौँ बराबरको ऋण कसरी तिरिएला भन्ने बैंक वित्तिय संस्थाको चासो र चिन्ता हुनु स्वभाविकै हो ।

गुरुङले विभिन्न बैंक, विकास बैंक र लघुवित्त गरी ३५ वटा संस्थाबाट २७ अर्ब बढी ऋण लिएको पाइएको छ । सबैभन्दा बढी ऋण उनले स्ट्याण्डर्ड चार्टर्ड बैंकबाट लिएको पाइएको छ । गुरुङले भाटभटेनी लगायत ऊर्जा, रेष्टुरेन्ट,स्टिल लगायत क्षेत्रमा पनि लगानी गरेका छन् ।

पञ्चायतकालमा सुवर्णसमशेरलाई राजद्रोहको अभियोग लगाएर सरकारले उनको नाममा भएको ललितानिवासको १४ रोपनी जग्गा जफत गरेको थियो। जसमा ललिता निवासको बाँकी २८५ रोपनी जग्गा सरकारले २०२१ सालमा अधिग्रहरण गरेको थियो । त्यसपछि बहुदल आएपछि २०४७ सालमा राणा परिवारले जफत गरिएका आफ्ना जग्गा फिर्ता गर्न सरकारसँग माग गरेपछि कृष्णप्रसाद भट्टराई सरकारले जफत गरेको जग्गा छानबिन गरेर फिर्ता गर्ने निर्णय गरेको थियो ।

३५ वटा संस्थामा २७ अर्ब बढी ऋण

ललिता निवास जग्गा हिनामिना प्रकरणमा हिरासतमा रहेका व्यवसायी मीनबाहुर गुरुङले माउन्टेन इनर्जी नेपालका नाममा ६ अर्ब २३ करोड, भाटभटेनी सुपर मार्केट एण्ड डिपार्टमेन्ट स्टोरका नाममा ५ अर्ब ३२ करोड रहेको छ ।

त्यसैगरी मरुन्स ट्रेडिङका नाममा १७ करोड ४२ लाख, काठमाण्डु स्टीलका नाममा १५ अर्ब ४५ करोड, भाटभटेनी ज्वेलर्सका नाममा ४ करोड,द अंकल्स स्पाइसी फुडका नाममा १ करोड, भाटभटेनी मनी ट्रान्सफरको नाममा २ करोड ७२ लाख,भाटभटेनी फर्निचरको नाममा ५८ लाख र भाटभटेनी इन्टरनेशनलको नाममा २८ करोड ४९ लाख रुपैयाँ ऋण रहेको पाइएको छ ।

त्यसो त गुरुङ हिरासतमा भएपनि भाटभटेनी सुपरमार्केट सहित गुरुङको अन्य व्यापार व्यवसाय उनका परिवारले चलाइरहेका छन् । भाटभटेनी सुपरमार्केटको बोर्डमा गुरुङकी श्रीमती, छोरा र भाइ छन् । सावित्री सुपरमार्केटको निर्देशक, पहलमान कार्यकारी निर्देशक र कल्याण कार्यकारी निर्देशक छन् ।

यस अघि पनि २०७६ मा विशेष अदालतमा दायर भएको भ्रष्टाचार मुद्दामा गुरुङले आधा अर्ब हिनामिना गरेको अभियोग लागेको थियो । अवैध ढङ्गले सरकारी जग्गा कम्पनी र परिवारको नाममा किनबेच गरेकोमा ५० करोड ४७ लाख ६८ हजार रुपैयाँ बिगो, जरिवाना र जग्गा जफतको माग गरिएको भएपनि उनले दुई करोड रुपैयाँ धरौटी बुझाएर पुरानो मुद्दा पनि खेपिरहेका छन् ।

पछिल्लो समय सामान्य व्यवसायी हुँदै खरबौँको व्यापारिक साम्राज्य खडा गर्न सफल भएका मीनबहादुरमाथि ललिता निवासको जग्गा हिनामिना गरेको आरोपमा थुनामा परेसंगै अब उनको अर्बौको साम्राज्य के हुने भन्नेमा धेरैको चासो र कतिपयको चिन्ता रहेको देखिन्छ।

मिती : ५ भाद्र २०८०, मंगलवार १८:२१ बजे प्रकाशित