काठमाडौँ । नेकपा एमाले अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डले १० हजार मेगावाट बिजुली भारतले बनाउने गरी गरेको सम्झौता हचुवा निर्णय भएको आरोप लगाएका छन् । नेपाल बुद्धिजीवी परिषद्ले बिहीवार आयोजना गरेको ‘उर्जा क्षेत्र तथा विद्युत व्यापार – नेपाल भारत सन्दर्भ’ विषयक गोष्ठीमा अध्यक्ष ओलीले प्रधानमन्त्री प्रचण्डले हालै भारत पुगेर गरेको विद्युत व्यापार सम्वन्धि सम्झौता नेपालको हितभन्दा पनि भारतकै हित अनुरुप भएको भएको तर्क गरे ।

त्यस्तै उनले संसदले समेत पारित गरेको फुकोट कर्णाली सस्तोमा बनाउन सकिने गरी सबै संरचना समेत तयार गरिसकेको अवस्थामा एकाएक आन्तरिक छलफल नगरी भारतलाई सुम्पेको आरोप लगाए । ‘फुकोट कर्णाली संसदले समेत स्वदेशी पूँजीबाटै सस्तोमा बनाउने भनी पारित गरिसकेको योजना प्रचण्डले हामीलाई पत्तै नदिई भारतलाई सुम्पिदिए ।’ उनले अगाडि थपे । ‘उर्जा बेच्ने सम्झैता भयो भनेर अहिले मच्चिरहेका छन्,जुन निरर्थक हो ।’उनले स्वदेशमा बनाउने उर्जाको आयोजनामा आफ्नो नियन्त्रण हुनुपर्नेमा जोड दिए ।

‘जल उर्जामाथि हाम्रो नियन्त्रण हुनुपर्छ,एउटा पावर प्रोजेक्ट बन्यो लाभ के ? कति लगानी कति लाभ जमीन हाम्रो,पानी हाम्रो,सबै हाम्रो अनी उत्पादित उर्जामा भारतको नियनत्रण कदापी स्वीकार्य हुँदैन ।’ ओलीले अगाडि थपे । ‘नेपालको नीति अरु कसैबाट गाइडेड भएको अनुभव भैरहेछ, विद्युत छेलोखेलो छ भन्ने फेरी तीनैलाई लोडसेडिङ गराइरहने बोलीले उद्योग बचाउने भनेपनि व्यवहारले बन्द गर्ने देखिएको छ ।’

कार्यक्रममा बुद्धिजीवी परिषद्का अध्यक्ष एवं बाग्मती प्रदेश सभाका सदस्य डा. दीनेशचन्द्र देवकोटाले नीतिगत तवरले उल्झन हटाउन सके जलविद्युतबाट नेपालले आर्थिक वृद्धिदरमा ठूलो टेवा पुर्याउने भनाई राखे । उनले नेपाल र भारतबीच भएका विद्युत व्यापार सम्झौतामार्फत नेपालले तुलनात्मक लाभ लिने योजनामात्र अघि सार्न जोड दिए ।

कार्यक्रममा नेपाल विद्युत प्राधिकरणका पूर्व कार्यकारी निर्देशक हितेन्द्रदेव शाक्यले नेपालको उर्जा क्षेत्र र विद्युत व्यापार–नेपाल भारत शन्दर्भ विषयमा सन्दर्भपत्र प्रस्तुत गरेका थिए । जसमा नेपाल विद्युत प्राधिकरणका पूर्व कार्यकारी निर्देशकद्वय मधुसुदन अधिकारी र मुकेश काफ्लेले टीप्पणी गरेका थिए ।

मिती : २५ श्रावण २०८०, बिहीबार २०:०० बजे प्रकाशित