काठमाडाैं । नेपाल रिपब्लिक मिडियाको सेयर आउँदो आइतबारबाट धितोपत्र दोस्रो बजारमा कारोबारमा आउने भएकाे छ।

नेपाल स्टक एक्सचेन्ज (नेप्से)मा आज रिपब्लिक मिडियाको आईपीओ सूचीकृत भएकाे छ । कुनै पनि कम्पनीको धितोपत्र नेप्सेमा सूचीकृत भएको दोस्रो दिन अर्थात भोलिपल्टबाट कारोबारमा आउने व्यवस्था छ। तर, भोलि शुक्रबार परेकोले रिपब्लिक मिडियाको सेयर आउँदो आइतबारबाट कारोबारमा आउने भएकाे छ।

नेप्सेमा नेपाल रिपब्लिक मिडियाको १०० अंकित दरका कुल ९६ लाख ७५ हजार कित्ता सेयर सूचीकृत भएको छ। जसमा संस्थापक समूहको ५३ लाख २२ हजार कित्ता (५५.००७८ प्रतिशत) र सर्वसाधारण (वैदेशिक रोजगारीमा रहेका नेपाली, सामूहिक लगानी कोष र कर्मचारीसमेत)को ४३ लाख ५३ हजार कित्ता (४४.९९२२ प्रतिशत) छ।

नेप्सेले रिपब्लिक मिडियालाई ‘एनआरएम’ कारोबार संकेत प्रदान गरेको छ। पहिलो कारोबारका लागि भने नेप्सेले प्रतिकित्ता न्यूनतम ८४.४७ रुपैयाँदेखि अधिकतममा २५३.४१ रुपैयाँ तोकेको छ।

आउँदो आइतबार स्पेसल प्रि–ओपन सेसनमा रिपब्लिक मिडियालाईको सेयर नेप्सेले तोकेको रेन्जभित्र किनबेच भएमा नियमित समयका लागि कारोबारमा आउनेछन्।

मिती : १८ श्रावण २०८०, बिहीबार १२:४३ बजे प्रकाशित