बिपिडब्लु लघुवित्तको आइपीओ शुक्रबार (चैत ३ गते) बाँडफाँड हुने भएको छ । बिक्री प्रबन्धक मेगा क्यापिटलका अनुसार शुक्रबार बिहान ११ बजे आइपीओ बाँडफाँड गर्ने तयारी गरिएको हो ।
बिपिडब्लु लघुवित्तले गत फागुन १८ गतेदेखि फागुन २३ गतेसम्म आफ्नो जारी पुँजी ३ करोड रुपैयाँको ३२.३३ प्रतिशतले हुन आउने १०० अंकित दरका कुल ९७ हजार कित्ता आईपीओ बिक्री गरेको थियो। जसमा १० प्रतिशलते हुन आउने ९ हजार ७ कित्ता सेयर वैदेशिक रोजगारीमा रहेका नेपालीहरुलाई बिक्री गरिसकिएको थियो भने १ हजार ५०० कित्ता सेयर कर्मचारीलाई र ४ हजार ८५० कित्ता सामूहिक लगानी कोषलाई सुरक्षित राखी बाँकी रहेको ८० हजार ९५० कित्ता सेयरमा सर्वसाधारणले खरिद आवेदन दिन सक्ने व्यवस्था गरिएको थियो।
अन्तिम दिनसम्म यो आईपीओमा करिब १५ लाख ३३ हजार आवेदकले कुल १ करोड ६७ लाख ६५ हजार बढी कित्ता सेयर खरिदका लागि आवेदन दिएका छन्।
मागभन्दा बढी आवेदन परेकै कारण यो आईपीओ गोलाप्रथाबाट बाँडफाँड गरिनेछ। जसमा भाग्यमानी ८ हजार ९५ जनाले मात्र १० कित्ताका दरले सेयर पाउने छन्। यस हिसाबले यो आईपीओमा करिब सवा १५ लाख आवेदकको हात खाली हुने देखिएको छ।
