काठमाडौं । दशैंको करिब १० दिन लामो बिदापछि सोमबार सेयरबजार खुल्दै छ। लामो बिदापछि कारोबार सुरु हुन लाग्दा लगानीकर्ताको ध्यान बजारको सम्भावित दिशातर्फ केन्द्रित भएको छ।
बिदाअघि रोकिएका लगानीका निर्णय, पछिल्लो आर्थिक तथा राजनीतिक घटनाक्रम र लगानीकर्ताको मनोविज्ञानले पहिलो दिनको कारोबारलाई प्रभावित गर्न सक्ने देखिएको छ। लामो बिदापछि बजार खुल्दा सेयरको मूल्य र कारोबार रकममा उतारचढाव देखिन सक्ने भएकाले लगानीकर्ता सतर्क छन्।
यस वर्षको दशैं बिदाका क्रममा देशभित्र र अन्तर्राष्ट्रिय बजारमा ठूला परिवर्तन नदेखिएकाले बजारको दिशा अनुमान गर्न कठिन छ। नयाँ सरकार गठनपछि पनि अपेक्षाअनुसार बढ्न नसकेको बजारमा पहिलो दिन सामान्य वृद्धि भए पनि तत्काल ठूलो उछाल आउने सम्भावना कम रहेको लगानीकर्ताहरूको आकलन छ।
यद्यपि, पहिलो दिनको कारोबारले मात्रै बजारको आगामी दिशा निर्धारण नगर्ने भएकाले लगानीकर्ताको ध्यान परिसूचकसँगै कारोबार रकम र कम्पनीहरूको सेयर मूल्यमा देखिने परिवर्तनतर्फ रहनेछ।
