काठमाडौँ । सञ्चालनमा रहेका २० वाणिज्य बैंकले आर्थिक वर्ष २०८२/८३ मा करिब ७० अर्ब रुपैयाँ खुद नाफा आर्जन गरेका छन्। सार्वजनिक वित्तीय विवरणअनुसार बैंकहरूले कुल ६९ अर्ब ८८ करोड रुपैयाँभन्दा बढी खुद नाफा कमाएका हुन्। अघिल्लो आर्थिक वर्षको तुलनामा बैंकहरूको कुल नाफा करिब ३२ प्रतिशतले बढेको छ।
नाफा आर्जनका आधारमा नबिल बैंक पहिलो स्थानमा रहेको छ। नबिलले ७ अर्ब ९० करोड ५७ लाख रुपैयाँ खुद नाफा कमाएको छ। बैंकको नाफा अघिल्लो आर्थिक वर्षको तुलनामा ३३.५० प्रतिशतले बढेको हो।
त्यसैगरी कुमारी बैंक ७ अर्ब ३८ करोड ७१ लाख रुपैयाँ नाफासहित दोस्रो र ग्लोबल आईएमई बैंक ६ अर्ब २२ करोड ७१ लाख रुपैयाँसहित तेस्रो स्थानमा छन्। कुमारी बैंकको नाफा अघिल्लो वर्षको तुलनामा ३०५ प्रतिशतभन्दा बढीले बढेको छ भने ग्लोबल आईएमईको नाफा २२.६७ प्रतिशतले बढेको देखिन्छ।
एभरेस्ट बैंकले ५ अर्ब ६ करोड ९९ लाख, राष्ट्रिय वाणिज्य बैंकले ४ अर्ब ५५ करोड ६८ लाख, नेपाल बैंकले ४ अर्ब ५० करोड १ लाख, प्राइम कमर्सियल बैंकले ४ अर्ब ११ करोड २५ लाख र एनएमबी बैंकले ४ अर्ब १ करोड ३६ लाख रुपैयाँ खुद नाफा कमाएका छन्। सानिमा बैंकको नाफा ३ अर्ब ५५ करोड १ लाख र सिद्धार्थ बैंकको ३ अर्ब ५१ करोड ९४ लाख रुपैयाँ पुगेको छ।
समग्र बैंकिङ क्षेत्रको नाफा बढे पनि सबै बैंकको वित्तीय अवस्था भने समान छैन। लक्ष्मी सनराइज बैंकको नाफा २३.२६ प्रतिशत, स्ट्यान्डर्ड चार्टर्ड बैंकको ५.३८ प्रतिशत, नेपाल इन्भेस्टमेन्ट मेगा बैंकको ३६.५८ प्रतिशत र कृषि विकास बैंकको नाफा २९.५१ प्रतिशतले घटेको छ।
यता, अघिल्लो वर्षको तुलनामा ठूलो सुधार गर्दै एनआईसी एसिया बैंक नाफामा फर्किएको छ। अघिल्लो आर्थिक वर्षमा ठूलो घाटा व्यहोरेको बैंकले यस वर्ष १८ करोड रुपैयाँभन्दा बढी खुद नाफा कमाएको छ।
यस अवधिमा प्रभु बैंक भने नाफाबाट घाटामा गएको छ। बैंकले समीक्षा अवधिमा २४ करोड रुपैयाँभन्दा बढी खुद नोक्सानी व्यहोरेको छ। अघिल्लो वर्ष प्रभु बैंक ८७ करोड रुपैयाँभन्दा बढी नाफामा रहेको थियो।
प्रतिशतका आधारमा हिमालयन बैंकको नाफा वृद्धिदर सबैभन्दा उच्च देखिएको छ। अघिल्लो वर्ष १२ करोड ९७ लाख रुपैयाँ नाफा गरेको बैंकले यस वर्ष १ अर्ब ४८ करोड रुपैयाँभन्दा बढी नाफा कमाएको छ। यद्यपि अघिल्लो वर्षको नाफा आधार निकै कम भएकाले प्रतिशतगत वृद्धि असाधारण देखिएको हो।
समग्रमा हेर्दा बैंकहरूको नाफामा उल्लेख्य सुधार आएको भए पनि केही बैंकको घट्दो नाफा र प्रभु बैंकको घाटाले बैंकिङ क्षेत्रमा अझै चुनौतीपूर्ण अवस्थामा रहेको देखाउँछ। नाफाको वृद्धिसँगै बैंकहरूको कर्जा गुणस्तर, खराब कर्जा, प्रोभिजनिङ र आम्दानीको संरचनालाई समेत हेर्नुपर्ने अवस्था पछिल्लो वित्तीय विवरणले देखाएको छ।
कुन बैंकले कति कमाए ?
