काठमाडौँ । सरकारले दोस्रो चरणअन्तर्गत काठमाडौँ उपत्यकाका बागमती नदी तथा यसका सहायक नदी किनारमा रहेका सुकुमबासी बस्ती हटाउने अभियानलाई तीव्र बनाएको छ। सोही क्रममा टेकु क्षेत्रको बस्तीमा डोजर चलाउन सुरु गरेको छ।
स्थानीय प्रशासनका अनुसार नदी किनार अतिक्रमण हटाई वातावरण संरक्षण, नदी प्रवाह सुधार तथा बाढी जोखिम न्यूनीकरण गर्ने उद्देश्यले अभियान सञ्चालन गरिएको हो। यसअघि पहिलो चरणमा पनि विभिन्न स्थानका बस्ती हटाइएको थियो।
टेकु क्षेत्रमा सुरक्षाकर्मीको बाक्लो उपस्थिति रहेको छ भने सम्भावित अवरोधलाई ध्यानमा राख्दै सुरक्षा सतर्कता बढाइएको छ। बस्ती हटाउने क्रममा केही स्थानमा स्थानीय बासिन्दाको असन्तुष्टि देखिए पनि स्थिति नियन्त्रणमा रहेको जनाइएको छ।
घरबार गुमाएका परिवारमध्ये आश्रयस्थल नभएका तथा तत्काल वैकल्पिक व्यवस्था गर्न नसक्नेहरूलाई अस्थायी रूपमा होल्डिङ सेन्टरमा राख्ने तयारी गरिएको छ। सम्बन्धित निकायले उनीहरूको पहिचान संकलन, राहत वितरण तथा दीर्घकालीन पुनःस्थापनाका विकल्पबारे पनि काम अघि बढाएको जनाएको छ।
महानगरपालिकाले नदी किनार क्षेत्रलाई व्यवस्थित बनाउने, हरित क्षेत्र विकास गर्ने तथा सार्वजनिक उपयोगमा ल्याउने योजना रहेको बताएको छ। साथै, जोखिमयुक्त क्षेत्रमा बसोबास नगर्न सर्वसाधारणलाई सचेत गराउँदै वैकल्पिक व्यवस्थापनमा सहकार्य गर्न आग्रह गरिएको छ।
