अध्यादेशको चौतर्फी विरोध, आज राष्ट्रपतिले संविधानविद्हरूसँग परामर्श गर्ने

काठमाडौँ । सरकारले संसद् रोकेर धमाधम अध्यादेश सिफारिस गरेपछि राष्ट्रपति रामचन्द्र पौडेलले आज संविधानविद्हरूसँग परामर्श गर्ने भएका छन् । राष्ट्रपति पौडेलले आज अपराह्न छलफल गर्ने तय भएको राष्ट्रपतिको सचिवालयले जानकारी दियो ।

सरकारले वैशाख १४ गते संवैधानिक परिषद्को काम कर्तव्य र अधिकार सम्बन्धी ऐन, २०६६ र सहकारी ऐन, २०७४ लाई संशोधन गर्ने अध्यादेश र वैशाख १५ गते स्वास्थ्य विज्ञान प्रतिष्ठान सम्बन्धी अध्यादेश, केही नेपाल कानुन संशोधन गर्न बनेको अध्यादेश र विश्वविद्यालयसम्बन्धि अध्यादेश जारी गर्नका लागि  राष्ट्रपतिसमक्ष सिफारिस गरेको छ।

यतिबेला संसद अधिवेशन रोकेर अध्यादेश ल्याएको भन्दै सरकार चौतर्फी विरोध भइरहेको छ । विपक्षी दल लगायत विभिन्न सरोकारवाला समूहले समेत  अध्यादेश जारी नगर्न राष्ट्रपतिसमक्ष माग समेत गरेका छन् ।