आयोजक राष्ट्र भारत र इङ्ल्यान्ड तेस्रोपल्ट आइसिसी ट्वान्टी विश्वकपको उपाधि उचाल्न दुई कदम मात्र पछाडि छन्। यी दुई राष्ट्र बिहीबार मुम्बई शहरमा हुने सेमिफाइनलमा जित निकाल्ने लक्ष्यसहित एकअर्काविरुद्ध चुनौती प्रस्तुत गर्दैछन्।
समान दुईपल्ट च्याम्पियन भारत र इङ्ल्यान्ड तेस्रोपटक छोटो फरम्याटको विश्वकप उपाधि उचाल्ने दाउमा छन्। दुवै टोली समान एकपल्ट हार बेहोर्दै सेमिफाइनलसम्म आइपुगेका हुन्। भारतले सुपर आठमा र इङ्ल्यान्डले समूहचरणमा हार बेहोरेका थिए। बिहीबार दोस्रो हार हुँदा एक टोलीको उपाधि यात्रामा टुङ्गो लाग्नेछ।
भारतका बलिङ प्रशिक्षक मोर्ने मोर्केलले इङ्ल्यान्डलाई हराउन विशेष प्रदर्शन आवश्यक पर्ने बताए। साथै उनले इङ्ल्यान्डलाई ‘स्ट्रिट स्मार्ट’ टोलीको संज्ञा दिए। भारतले आइतबार कोलकातामा वेस्ट इन्डिजविरुद्ध १९६ रनको लक्ष्य पछ्याउँदै जित निकालेका थियो। त्यही जितसँगै भारत सेमिफाइनलमा पुगेको हो। यस क्रममा सन्जु सामसनले अविजित ९७ रनको सानदार इनिङ खेले।
बिहीबार राति मुम्बईमा हुने सेमिफाइनलमा पनि कसैले जिम्मेवारी लिँदै उत्कृष्ट प्रदर्शन गर्नुपर्ने मोर्केलको भनाइ छ। तब मात्र ह्यारी ब्रुकको टोलीलाई हराउँदै घरेलु टोलीको विश्वकप जित्ने आशा जीवन्त रहने उनले उल्लेख गरे। ‘हामीले अहिलेसम्म पूर्ण खेल खेलेका छैनौं भन्ने कुरा गरेका छैनौं,’मुम्बईको वानखेडे स्टेडियममा अभ्यासपछि पत्रकारसँग कुरा गर्दै मोर्केलले भने, ‘सेमिफाइनलसम्म कसरी पुग्यौं भन्नेभन्दा पनि अबका दुई खेल कसरी खेल्छौं भन्ने महत्त्वपूर्ण छ। आवश्यक पर्दा कोही न कोही अगाडि आउने क्षमता भारतीय टोलीमा छ।’
भारतले इङ्ल्यान्डसँग टी ट्वान्टी विश्वकपको सेमिफाइनलमा प्रतिस्पर्धा गरेको यो लगातार तेस्रो पटक हो। अघिल्ला दुवै सेमिफाइनमा विजेता टोलीले नै उपाधि उचाले।
