काठमाडौं । लुम्बिनी विकास बैंकले गत आर्थिक वर्ष २०७९/८० को चौथो त्रैमाससम्मको अपरिष्कृत वित्तीय विवरण सार्वजनिक गरेको छ । गत आर्थिक वर्षको अन्त्यसम्ममा बैंकको नाफा घटेको छ । खराब कर्जा (एनपीएल) र इम्पेरमेन्ट चार्ज बढेपछि बैंकको खुद नाफामा सामान्य गिरावट आएको हो ।
गत आर्थिक वर्षको अन्त्यसम्म बैंकले ६१ करोड २४ लाख रुपैयाँ खुद नाफा आर्जन गरेको छ। यो अघिल्लो आर्थिक वर्षको तुलनामा ३.८८ प्रतिशतले थोरै हो । अघिल्लो वर्ष सोही अवधिमा बैंकले ६३ करोड ७१ लाख रुपैयाँ नाफा आर्जन गरेको थियो । बैंकको वितरणयोग्य मुनाफा ३९ करोड २७ लाख रुपैयाँ रहेको छ।
बैंकको सञ्चालन मुनाफा पनि ७.७० प्रतिशतले घटेर ८६ करोड ७३ लाख रुपैयाँ भएको छ । अघिल्लो वर्ष यस्तो मुनाफा ९४ करोड १९ लाख रुपैयाँमा सीमित थियो ।
बैंकको खुद ब्याज आम्दानी भने २२.३१ प्रतिशतले बढेर १ अर्ब ८७ करोड रुपैयाँ पुगेको छ। अघिल्लो वर्ष सोही अवधिसम्म बैंकको खुद ब्याज आम्दानी १ अर्ब ५३ करोड रुपैयाँ रहेको थियो ।
बैंकको खराब कर्जा अनुपात बढेर ३.०१ प्रतिशत पुगेको छ। अघिल्लो वर्ष एनपीएल १.६८ प्रतिशत थियो। खराब कर्जा बढेसँगै बैंकको इम्पेयरमेन्ट चार्ज बढेर ४० करोड ३१ लाख रुपैयाँ पुगेको छ। अघिल्लो वर्ष यस्तो चार्ज ३ करोड ४० लाख रुपैयाँमात्रै थियो।
बैंकको जगेडा कोषमा २ अर्ब ३८ करोड रुपैयाँ सञ्चित छ । बैंकको चुक्ता पुँजी ३ अर्ब ३८ करोड रुपैयाँ रहेको छ ।
बैंकको प्रतिसेयर आम्दानी (ईपीएस) १९.४० रुपैयाँबाट घटेर १८.११ रुपैयाँ कायम भएको छ । मूल्य अनुपात आम्दानी (पीई रेसियो) २२.८१ गुणा रहेको बैंकको प्रतिसेयर नेटवर्थ १८२.८७ रुपैयाँ रहेको छ।
समीक्षा अवधिमा बैंकले ४९ अर्ब १३ करोड रुपैयाँ निक्षेप संकलन गरी ४१ अर्ब ५६ करोड रुपैयाँ कर्जा परिचालन गरेको छ।
अर्थ सन्जाल