काठमाडौं । चालु आर्थिक वर्ष २०७९/८० को चैतसम्ममा बीमितहरुले साढे ९ अर्ब रुपैयाँ भन्दा बढीको बीमा पोलिसी त्याग (सरेन्डर) गरेका छन् । बीमा प्राधिकरणको तथ्यांक अनुसार चालु आर्थिक वर्षको यस अवधिमा जीवन बीमा कम्पनीका बीमितहरुले ९ अर्ब ६७ करोड ५६ लाख रुपैयाँ बराबरको बीमा पोलेसी त्याग गरेका हुन् । यो अवधिमा ६५ हजार ८५० वटा बीमालेख सरेन्डर भएका छन् ।

चालु आर्थिक वर्षको चैतमा मात्रै बीमितहरुले जीवन बिमा कम्पनीहरुबाट १ अर्ब १८ करोड ६ लाख रुपैयाँ बराबरका ९ हजार ३५८ वटा बिमालेख त्याग गरेका छन् ।

सबैभन्दा धेरै पोलिसी त्याग्नेमा नेपाल लाइफ इन्स्योरेन्सका बीमितहरु रहेको छन् । चैत महिनामा कुल सरेन्डर भएको बीमा पोलिसी मध्ये कम्पनीबाट २८.८३ पोलीसी सरेन्डर भएको छ । कम्पनीको २ हजार ६९८ वटा बीमालेख वापत ४२ करोड २२ लाख ५८ हजार रुपैयाँ बराबरको पोलीसी सरेन्डर भएको हो ।

यस्तै, प्राधिकरणका अनुसार सबै भन्दा कम पोलिसी सरेन्डर हुनेमा सन नेपाल लाइफ इन्स्योरेन्स रहेको छ । यस अवधिमा सन नेपालबाट बिमितहरुले ३२ लाख ३३ हजार रुपैयाँ बराबरको ३१ वटा मात्रै पोलिसीहरु त्याग गरेका छन् ।

मिती : ४ जेष्ठ २०८०, बिहीबार १७:३२ बजे प्रकाशित