काठमाडौं । सिद्धार्थ बैंक लिमिटेडले अभिभावक तथा बालबालिकालाई लक्षित गर्दै “सिद्धार्थ पे एण्ड सेभ खाता” सञ्चालनमा ल्याएको छ । बैंकले शून्य मौज्दातमै खोल्न सकिने गरी उक्त खाता सञ्चालनमा ल्याएको हो ।

यस खातामा अभिभावकले डेबिट कार्ड र मोबाईल बैंकिङ्ग मार्फत रु १०० भन्दा बढीको विद्युतिय कारोबार गरेको अवस्थामा सो कारोबार रकमलाई आधार बनाई निश्चित रकम अभिभावकको खाताबाट कट्टा भई बालबालिकाहरूको खातामा स्वतः जम्मा हुने बैंकले जनाएको छ ।

बैंकले डिजिटल कारोबारलाई प्रोत्साहित गर्दै बालबालिकाको लागि आजैबाट स–सानो बचत गर्दै जान अभिप्रेरित गर्ने उद्देश्यका साथ सञ्चालनमा ल्याइएको यस खातामा बैंकले अभिभावक र बालबालिका दुबैको खातामा विशेष आकर्षणको रुपमा पहिलो वर्षका लागि नि:शुल्क डेबिट कार्ड र बैंकस्मार्ट एक्सपी सेवा प्रदान गर्नेछ ।

बैंकका अनुसार यो खाता खोली यथाशीघ्र लाभ लिन प्रेरित गर्ने उद्देश्यका साथ सीमित अवधिका लागि क्यासब्याक योजना पनि उपलब्ध गराइएको छ ।

क्यासब्याक योजना अन्तर्गत अभिभावकहरुले डेबिट कार्ड मार्फत पहिलो पटक पीओएस वा अनलाइनबाट न्यूनतम १ हजार रुपैयाँको कारोबार गर्दा कारोबार रकमको ५ प्रतिशत वा अधिकतम १ सय रुपैयाँ क्यासब्याक पाउने बैंकले जनाएको छ ।‘

बैंकका देशभर संचालनमा रहेका १९५ शाखा कार्यालयहरुबाट यो बचत खाता खोल्न सकिने छ ।

मिती : २६ बैशाख २०८०, मंगलवार १२:३३ बजे प्रकाशित