काठमाडौं । ईङवा हाइड्रोपावर लिमिटेडको आईपीओ बुधबार (वैशाख २७ गते) बाँडफाँट हुने भएको छ। कम्पनीको आईपीओ धितोपत्र बिक्री प्रबन्धक नेपाल एसबिआई मर्चेन्ट बैंकिङको कार्यालयमा बुधबार बिहान ९ बजे गरिने भएको हो ।
कम्पनीको आईपीओमा मागभन्दा बढी आवेदन परेको छ । सीडीएससीका अनुसार यो आईपीओमा अन्तिम दिन साँझसम्म १२ लाख ५९ हजार ९०१ आवेदकबाट कुल १ करोड ३७ लाख ८० हजार ८०० कित्ता सेयर माग भएको छ । जुन मागभन्दा १०.८६ गुणाले बढी हो।
मागभन्दा बढी आवेदक परेकै कारण यो आईपीओ पनि गोलाप्रथाबाट बाँडफाँट हुने छ। जसमा भाग्यमानी १ लाख २६ हजार ८६३ आवेदकले १० कित्ताका दरले सेयर पाउनेछन्। तिनै आवेदकमध्ये ९ जनाले थप १–१ कित्ता सेयर पाउनेछन्। यो आईपीओमा ११ लाख बढी आवेदकको हात खाली हुने देखिन्छ।
ईङवा हाइड्रोपावरले गत वैशाख १३ गतेदेखि वैशाख १७ गतेसम्म सर्वसाधारणका लागि आईपीओ बिक्री खुला गरेको थियो ।
बाँकी रहेको १० लाख ८० हजार कित्ता र स्थानीयलाई बिक्री हुन बाँकी २ लाख ९३ हजार १६० थपेर कुल १३ लाख ७३ हजार कित्ता सर्वसाधारणका लागि बिक्री खुला गरिएको थियो। त्यसमा २ प्रतिशतले हुन आउने २९ हजार ८६३ कित्ता कर्मचारीका लागि र ५ प्रतिशतले हुन आउने ७४ हजार ६५८ कित्ता सामूहिक लगानी कोषका लागि छुट्याइएको थियो। बाँकी १२ लाख ६८ हजार ६३९ कित्ताका लागि सर्वसाधारणले खरिद आवेदन दिन सक्ने व्यवस्था गरिएको थियो।
अर्थ सन्जाल