नेपाल इन्फ्रास्ट्रक्चर बैंक (निफ्रा)ले चालु आर्थिक वर्ष २०७९/८० को तेस्रो त्रैमाससम्मको परिष्कृत वित्तीय विवरण प्रकाशित गरेको छ। विवरण अनुसार बैंकको नाफा गत आर्थिक वर्षको सोही अवधिको तुलनामा बढेको छ।
बैंकले चालु आर्थिक वर्षको चैत मसान्तसम्ममा आइपुग्दा बैंकको नाफा ६७.२८ प्रतिशतले बढेको छ । यो अवधिसम्म बैंकको खुद नाफा १ अर्ब १६ लाख १८ हजार रुपैयाँ पुगेको छ । गत आर्थिक वर्षको सोही अवधिसम्ममा बैंकले ६९ करोड ४५ लाख रुपैयाँ नाफा कमाएको थियो।
चैत मसान्तसम्म खुद ब्याज आम्दानी ५५.२२ प्रतिशतले बढेर २ अर्ब ४४ लाख पुगेको छ । गत वर्षको सोही अवधिमा बैंकको यस्तो आम्दानी १ अर्ब २९ करोड १३ लाख रुपैयाँ रहेको थियो । सो अवधिसम्ममा बैंकको वितरणयोग्य मुनाफा ९१ करोड ६१ लाख रुपैयाँ रहेको छ।
समिक्षा अवधिसम्म बैंकको सञ्चालन मुनाफामा पनि उछाल आएको छ । यो अवधिमा बैंकको सञ्चालन मुनाफा ६७.३१ प्रतिशतले बढेको छ ।
गत आर्थिक वर्षको तेस्रो त्रैमासमा ९९ करोड २० लाख रुपैयाँ सञ्चालन मुनाफा आर्जन गरेकोमा यो आर्थिक वर्षको चैतसम्म १ अर्ब ६५ करोड ९७ लाख रुपैयाँ मुनाफा कमाएको छ ।
खुद नाफासँगै बैंकको प्रतिसेयर आम्दानी पनि बढेको छ । गत आर्थिक वर्षको चैत मसान्तसम्ममा ४ रुपैयाँ २९ पैसा रहेको बैंकको यस्तो आम्दानी, चालु आर्थिक वर्षको सोही अवधिसम्ममा २ रुपैयाँ ८८ पैसा बढेर ७ रुपैयाँ १७ पैसा पुगेको छ।
सो अवधिसम्ममा बैंकको प्रतिसेयर नेटवर्थ १०९ रुपैयाँ १९ पैसा रहेको छ भने मूल्य आम्दानी अनुपात ३०.६३ गुणा रहेको छ।
