कोशी प्रदेशका मुख्यमन्त्रीसहित अधिकांश मन्त्रीहरूको काठमाडौंमा घरजग्गासँगै विभिन्न कम्पनीको शेयरमा करोडौंको लगानी रहेको देखिएको छ । कोशीका ६ मध्ये ४ मन्त्रीको काठमाडौं उपत्यकामा घर र जग्गा रहेको छ ।
मुख्यमन्त्री हिक्मत कार्कीले बुझाएको सम्पत्ति विवरणमा श्रीमती अञ्जना पाण्डेको नाममा ललितपुर महालक्ष्मी नगरपालिका ४ मा २३२ र २८६ वर्ग मिटर जग्गा रहेको उल्लेख गरेका छन् । उनले सो जग्गा १ करोड ४० लाखमा किनेको विवरणमा उल्लेख गरेका छन् । उनले सो जग्गा किन्न एभरेष्ट बैकबाट ९० लाख रुपैयाँ ऋण लिएको उल्लेख गरेका छन् ।
उनले बुझाएको सम्पत्ति विवरणमा झापाको गौरा दहमा दाजु दीपक कार्की र आफ्नो नाममा कट्टा १० धुरमा बनेको दुई तल्ले पक्की घर, गौरा दह ३ मा ३ कट्ठामा बनेको पक्की घर र टहरा रहेको सम्पत्ति विवरण पेस गरेका छन् ।
मुख्यमन्त्री कार्कीले श्रीमतीकै नाममा लिभरपुल एजुकेसन नेटवर्क प्रालि मा २१ लाख ३८ हजार ७ सय, आफ्नै नाममा ड्रिमल्याण्ड हाउजिङमा १० लाख र सहिद मेमोरियल अस्पतालमा १ लाख ५० हजार रुपैयाँको शेयर रहेको उल्लेख गरेका छन् । यस्तै झापाको गौरा दह कृषि तथा पशुपक्षी विकास फर्म ३ लाखमा २०७३ सालमा स्थापना गरेर सञ्चालनमा रहेको उनले जनाएका छन् ।
सामाजिक विकास मन्त्री बुद्धिकुमार राजभण्डारीको काठमाडौं वडा नम्बर ३२ मा १३७ वर्ग मिटर जग्गा रहेको छ । उनले सो जग्गा ४६ लाख ५० हजारमा २०५८ सालमा खरिद गरेको सम्पत्ति विवरण पेस गरेका छन् । यस्तै राजभण्डारीको सोलुखुम्बुको सोलुदुधकुण्डको ६ नम्बर वडामा विभिन्न कित्तामा गरी १०६९२.५० वर्ग मिटर जग्गा पैतृक सम्पत्ति रहेको उल्लेख छ ।
मन्त्री राजभण्डारीको विभिन्न कम्पनीमा ५६ हजार ३५० कित्ता शेयर रहेको छ । जसमा सबैभन्दा धेरै सोलुखुम्बु ग्रुपमा ३० हजार कित्ता र बेनी हाइड्रोमा २० हजार, सोलु हाइड्रोमा ५ हजार कित्ता शेयर रहेको छ । उनले २० लाख रुपैयाँ ऋण देखाएका छन् ।
पर्यटन, वन तथा वातावरण मन्त्री जीवन आचार्य ललितपुर, विराटनगर तथा मोरङको बुढीगंगामा घर तथा जग्गा रहेको छ । उनले बुझाएको विवरणमा ललितपुर सुनकोठी ९ (क) को ७०४ कित्ता नम्बरमा ९ आना र १२८१ कित्ता नम्बरमा १ आना २ पैसा जग्गा रहेको छ । उक्त जग्गामा साढे दुई तले पक्की घर रहेको विवरणमा उल्लेख छ । उक्त सम्पत्ति व्यवसाय र पैतृक सम्पत्तिले ३६ लाखमा खरिद गरेको उनले जनाएका छन् ।
यस्तै विराटनगर महानगरपालिका १ (ख) ३१७८ कित्ता नम्बरमा १५ धुर जग्गामा आचार्यको साढे दुई तले पक्की घर रहेको छ । सो घरजग्गा १३ लाख ५० हजार पैतृक सम्पत्तिले खरिद गरेको उनले जनाएका छन् । यस्तै मोरङको साबिक हात्ती मुढामा मात्र ११ कित्ता जग्गा रहेको छ । हात्ती मुडा ४ मा २६३० वर्ग मिटर, साबिक हात्ती मुढा २ मा १९४७ वर्ग मिटर र हात्ती मुढा २ मै २०३१.७१ वर्ग मिटर जग्गा रहेको उनले विवरण बुझाएका छन् ।
मन्त्री आचार्यको एनस्याट प्रा.लि. काठमाडौंमा ३३ प्रतिशत शेयर रहेको छ । उनले सो शेयर ३० लाखमा खरिद गरेको बताएका छन् । यस्तै उनको जेएमडी ग्रुप अफ कम्पनी काठमाडौँमा ५० प्रतिशत शेयर रहेको छ । उनले सो शेयर ५० लाखमा खरिद गरेको बताएका छन् । उनले सो लगानी जग्गा विक्री तथा लाइफ कम्प्युटर प्वाइन्टको व्यवसायबाट आम्दानी गरेको उल्लेख गरेका छन् ।
प्रदेश सरकारका खानेपानी, सिँचाइ तथा ऊर्जा मन्त्री तिलकुमार मेन्याङ्बो लिम्बूसँग ताप्लेजुङको पाथीभरा याङ्वरक २ मा पैतृक सम्पत्ति, फुङलिङ ४ मा ५ रोपनी ३ आना श्रीमतीको नाममा र इटहरी ६ मा १६ धुर जग्गा रहेको उल्लेख छ । उक्त जग्गा तलबबाट खरिद गरेको उल्लेख गरिएको छ ।
अन्य मन्त्रीहरुको तुलनामा मन्त्री मेन्यांवोसँग शेयरमा कम लगानी छ । उनले बुझाएको सम्पत्ति विवरणमा विभिन्न चार वटा कम्पनीमा १० कित्ताको दरले मात्र ४० कित्ता शेयर रहेको उल्लेख गरेका गरेका छन् । उनको मैयुंग खोला जलविद्युत, सिंगटी हाइड्रो, सानिमा लाइफ इन्सुरेन्स र माथिल्लो हेवा खोला हाइड्रोमा शेयर लगानी रहेको छ ।
भौतिक पूर्वाधार विकास मन्त्री दुर्गाप्रसाद चापागाईँसँग श्रीमती इन्दिरा कार्कीको नाममा झापा बिर्तामोड ३ मा १ कट्टा जग्गा, मोरङ सुन्दरहरैंचा १ मा १ बिगाहा १० कट्टा जग्गा रहेको उल्लेख छ । सुन्दरहरैंचाको जग्गा कृषि फर्म सञ्चालनका लागि सामूहिक रूपमा खरिद गरिएको उनले जनाएका छन् ।
मन्त्री चापागाईँले अपर खोरङ खोला जलविद्युत् आयोजनामा आफ्नो र श्रीमतीको नाममा १.२५ प्रतिशत शेयर र अपर सोलुमा पनि ०.४८ प्रतिशत शेयर रहेको जनाएका छन् ।
स्वास्थ्य मन्त्री निर्मला लिम्बूले बुझाएको सम्पत्ति विवरणमा ताप्लेजुङ फुङलिङ ६ र ललितपुरको सानो हात्ती वनको जग्गामा घर रहेको उल्लेख गरेकी छिन् । तर उनले घर जग्गाको विस्तृत विवरण खुलाएकी छैनन् । लिम्बुले बुझाएको विवरणमा झापामा पनि जग्गा रहेको उल्लेख छ ।
यस्तै उद्योग, कृषि तथा सहकारी मन्त्री भक्तिप्रसाद सिटौलाले पनि आफ्नो सम्पत्ति विवरणमा झापा बिर्तामोड ७ मा विभिन्न कित्तामा गरेर ३० कट्टा ५ धुर जग्गा रहेको उल्लेख गरेका छन् । सम्पूर्ण जग्गा पैतृक सम्पत्ति रहेको उनको विवरणमा उल्लेख छ । सार्वजनिक भएको सम्पत्ति विवरणमा स्वास्थ्य मन्त्री लिम्बु र कृषि मन्त्री सिटौलाका नाममा भने शेयर रहेको उल्लेख छैन ।
