नेपाल धितोपत्र बोर्डका अध्यक्ष रमेशकुमार हमालले पुँजीबजारमा कारोबार लागत घटाएर सेवाको दयारा विस्तार गर्नुपर्ने बताएका छन् । ‘समृद्ध नेपालको आधारः पूँजीबजार सुधार’ विषयक अन्तरक्रिया कार्यक्रममा बोल्दै अध्यक्ष हमालले यस्तो बताएका हुन् ।

अध्यक्ष हमालले बजार सुधारका थुप्रै काम भइरहेकाले अब सुनौलो दिन आउने बताए । अध्यक्ष हमालले विश्व अर्थतन्त्रमा देखिएको मन्दिको प्रभाव नेपालको तरलतामा परेको र पुजी बजारमा पनि नकारात्मक असर देखिएको बताए ।उनले बजारको स्थायित्वका लागि आफुले धेरै काम गरिरहेको पनि बताए । ‘बजारको स्थायित्व र बिकासका लागि हामी पुरै ध्यान दिएका छौ । कर कम गराउने प्रयासमा जारी छ, यसपालि कर कम गराउछौ । त्यसले बजारको बिकास र राजस्व पनि वृद्धि हुन्छ।’ हमालले भने ।

बोर्डले सुशासन, उत्तरदायी, पारदर्शीता र स्वच्छ प्रतिस्पर्धाको नीति लिएको भन्दै यसलाई लागु गर्दा बजार आफैं सुधार हुने अध्यक्ष हमालको भनाइ छ । अहिलेका ब्रोकर प्रतिस्पर्धी हुनु पर्ने भन्दै अध्यक्ष हमालले ब्रोकरको संख्या बढाउनुपर्ने आवश्यक रहेको बताए । यसमा कसैले विरोध गर्नुपर्ने जरुरी नरहेको पनि उनले बताए ।

अध्यक्ष हमालले सर्वोच्च अदालतमा विचाराधीन मुद्दाहरु छिटो टुंगो लग्नु पर्ने समेत बताए। अदालतमा परेका नयाँ स्टक ब्रोकर र नयाँ स्टक एक्सचेन्ज सम्बन्धि मुद्दाहरु छिटो टुंगो लाग्नु पर्ने र यसको लागि आफुले पनि अदालतलाई आग्रह गरिरहेको उनको भनाई छ । अदालतले छिटो मुद्दाको टुंगो लगाउनु पर्ने भन्दै उनले यसलाई अनिर्णयको बन्दी बनाएर राख्न नहुने बताए । आफ्नो पक्षमा निर्णय नआए अर्को बाटोबाट भएपनि नयाँ स्टक एक्सचेन्ज, नयाँ स्टक ब्रोकर र कमोडिटी ल्याउनको लागि पहल गर्ने हमालले बताएका छन्। ।

बैंकको चर्को ब्याजदर, राष्ट्र बैंकको १२ करोडको सेयर धितो कर्जा (मार्जिन लेण्डिङ) लगायतका नीतिले सेयर बजारले अनपेक्षित गिरावट भोग्नु परेको विश्लेषक छोटेलाल रौनियारले बताए । उनले नयाँ ब्रोकर लाइसेन्स, नयाँ स्टक एक्सचेन्ज र कमोडिटिज मार्केट बजारमा आवश्यक रहेको बताए । रौनियारले ब्याजदर सिगल डिजिटमा झार्न बोर्डले राष्ट्र बैंकसँग छलफल गर्नुपर्ने बताएका छन् ।

उनले कुनै कम्पनीले लाभांश वितरण गरेपछि राष्ट्र बैंकले २-३ पटकसम्म घटाउँदा बजारमा असर परेको भन्दै यसमा राष्ट्रले विचार गर्नुपर्ने बताए । लगानीकर्ताले दोहोरो कमिशन बुझाउनुपर्ने, घाटामा जाँदा पनि चर्को कमिशन बुझाउनुपर्ने बाध्यता रहेको गुनासो गरे ।

ब्रोकरहरुमा मोनोपोली हाबी भएको भन्दै ब्रोकरहरु प्रतिस्पर्धामा आउन आग्रह गरे ।

मिती : १५ चैत्र २०७९, बुधबार १८:३९ बजे प्रकाशित