भौतिक संरचना तथा भवन निर्माणको नेतृत्व गर्ने शहरी विकास मन्त्रालयको जिम्मा ‘ठेकेदार सांसद’ विक्रम पाण्डेले पाएका छन् । राप्रपाका नेतासमेत रहेका ठेकेदार पाण्डेलाई सो पार्टीको सिफारिसमा प्रधानमन्त्री पुष्पकमल दाहाल प्रचण्डले आज मन्त्री नियुक्त गरेका छन् ।

प्रधानमन्त्री प्रचण्डको गृह जिल्ला चितवन–३ बाट निर्वाचित पाण्डेले भ्रष्टाचार कसूरमा विशेष अदालतमा मुद्दा खेपिरहेका छन् । उनीमाथि विभिन्न सडक आयोजना निर्माण गर्दा भ्रष्टाचार गरेको भन्दै अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दर्ता गरेको थियो ।

आफैँ महत्त्वपूर्ण विकास मन्त्रालय रहेको शहरी विकासमा पाण्डेको कालिका कन्स्ट्रक्सनले थुप्रै जिल्लाका योजना हात पारेको छ । ‘दूधको साक्षी बिरोलो’ भनेझै आजदेखि मन्त्री र ठेकेदार दुवै एकै व्यक्ति हुने अवस्था आएको छ ।

राप्रपाका अध्यक्ष राजेन्द्र लिङ्देनले सांसदको शपथ खाँदा ‘भ्रष्टाचार गर्नु आमाको रगत खाएसरह’ हो भन्दै भ्रष्टाचार नगर्ने प्रतिबद्धता जनाएका थिए । तर, अहिले भ्रष्टाचार मुद्दामा मुछिएर विवादित बनेका ठेकेदार पाण्डेलाई मन्त्री बनाएपछि लिङ्गदेनको भनाइ र गराइमा आकाश जमिनको अन्तर देखिएको छ ।

यसअघि राष्ट्रिय स्वतन्त्र पार्टीका रवि लामिछाने ‘कन्फ्लिक्ट अफ इन्ट्रेस्ट’ हुने गरी गृह मन्त्रालयको जिम्मेवारी सम्हाल्दै आएका छन् । उनको नागरिकतासम्बन्धी मुद्दा सर्वोच्च अदालतमा विचाराधीन छ ।

कालिका कन्स्ट्रक्सनका सञ्चालक पाण्डेलाई पनि ‘कन्फ्लिक्ट अफ इन्ट्रेस्ट’ हुने गरी शहरी विकास मन्त्री बनाइएपछि प्रधानमन्त्री प्रचण्डको समेत आलोचना हुन थालेको छ ।

अन्य थुप्रै विवादमा मुछिएका ठेकेदार पाण्डे विरुद्ध अख्तियार दुरुपयोग अनुसन्धान आयोगले भ्रष्टाचार मुद्दा सर्वाेच्चमा पुनरावलोकन गरेको छ ।

मिती : ३ माघ २०७९, मंगलवार २०:०९ बजे प्रकाशित