काठमाडौं । लाइफ इन्स्योरेन्स कर्पोरेसन (एलआईसी) नेपालको खुद नाफा चालु आर्थिक वर्षको पहिलो त्रैमासमा १०.५२ प्रतिशतले घटेको छ। कम्पनीले सार्वजनिक गरेको चालु आर्थिक वर्ष २०८३/८४ को पहिलो त्रैमासिक वित्तीय विवरणअनुसार असोज मसान्तसम्ममा ९ करोड ६९ लाख रुपैयाँ खुद नाफा आर्जन गरेको छ।
गत आर्थिक वर्ष २०८२/८३ को सोही अवधिमा कम्पनीले १० करोड ८३ लाख रुपैयाँ खुद नाफा कमाएको थियो। अघिल्लो वर्षको तुलनामा नाफा घटेसँगै कम्पनीको प्रतिशेयर आम्दानीमा समेत संकुचन आएको छ। समीक्षा अवधिमा प्रतिशेयर आम्दानी ७ रुपैयाँ ८८ पैसाबाट घटेर ७ रुपैयाँ ५० पैसामा झरेको छ।
बीमाशुल्क आर्जन र जीवन बीमा कोषमा वृद्धि
नाफा घटे पनि कम्पनीको बीमाशुल्क आर्जन र जीवन बीमा कोषको आकारमा भने वृद्धि देखिएको छ। चालु आर्थिक वर्षको पहिलो त्रैमाससम्ममा कम्पनीले ५ अर्ब ४६ करोड ३३ लाख रुपैयाँ कुल बीमाशुल्क आर्जन गरेको छ। यो गत आर्थिक वर्षको सोही अवधिको तुलनामा ९.६२ प्रतिशत बढी हो।
त्यस्तै, कम्पनीको खुद बीमाशुल्क आर्जन ९.५६ प्रतिशतले बढेर ५ अर्ब ४३ करोड ७३ लाख रुपैयाँ पुगेको छ।
कम्पनीको जीवन बीमा कोष पनि १०.३१ प्रतिशतले विस्तार भएको छ। गत आर्थिक वर्षको पहिलो त्रैमासमा १ खर्ब ३६ अर्ब ९५ करोड ८१ लाख रुपैयाँ रहेको जीवन बीमा कोषको आकार चालु आर्थिक वर्षको असोज मसान्तसम्ममा बढेर १ खर्ब ५१ अर्ब ८ करोड २० लाख रुपैयाँ पुगेको छ।
चुक्ता पुँजी र सञ्चित कोष
कम्पनीको चुक्ता पुँजी ५ अर्ब ५० करोड रुपैयाँ रहेको छ। गत असार मसान्तको तुलनामा कम्पनीको सञ्चित कोष तथा अन्य इक्विटीमा समेत सुधार देखिएको छ।
समीक्षा अवधिसम्ममा कम्पनीको रिटेन्ड अर्निङ २ अर्ब ६५ करोड ६१ लाख रुपैयाँबाट बढेर २ अर्ब ७४ करोड २४ लाख रुपैयाँ पुगेको छ। त्यस्तै, महाविपत्ति कोष ७७ करोड ३५ लाख रुपैयाँबाट बढेर ७८ करोड ३२ लाख रुपैयाँ कायम भएको छ।
अन्य इक्विटी ३५ करोड ५० लाख रुपैयाँबाट बढेर ३८ करोड ३० लाख रुपैयाँ पुगेको छ भने कम्पनीको शेयर प्रिमियम ४९ करोड ८० लाख रुपैयाँ रहेको छ।
अन्य वित्तीय सूचक
समीक्षा अवधिसम्ममा कम्पनीको प्रतिशेयर नेटवर्थ १८० रुपैयाँ १२ पैसा कायम भएको छ। वित्तीय विवरण सार्वजनिक हुँदाको समयमा कम्पनीको मूल्य आम्दानी अनुपात (पीई रेसियो) ११४.१३ गुणा रहेको छ।
