यसअघि ईसेवाको सीईओको जिम्मेवारी जगदीश खड्काले सम्हाल्दै आएका थिए। उनको कार्यकाल सकिएपछि सञ्चालक समितिले शर्मालाई नयाँ सीईओका रूपमा नियुक्त गरेको हो।
बैंकिङ क्षेत्रमा लामो अनुभव भएका शर्मा यसअघि नबिल बैंकमा कार्यरत थिए। बैंकिङ सेवासँगै डिजिटल रूपान्तरण, नवप्रवर्तन र नयाँ प्रविधिको प्रयोगका क्षेत्रमा समेत उनले काम गरेका छन्। बैंकिङ क्षेत्रमा रहँदा उनले डिजिटल प्रविधिको विस्तार तथा संस्थागत नवप्रवर्तनलाई प्राथमिकतामा राखेर विभिन्न पहल अघि बढाएका थिए।
विशेषगरी डिजिटल रूपान्तरणसँग सम्बन्धित योजना, प्रविधिको प्रयोग र नयाँ डिजिटल सेवाको विकासमा शर्माको अनुभव रहेको बताइएको छ। यही अनुभवका आधारमा उनलाई ईसेवाको नेतृत्वको जिम्मेवारी दिइएको हो।
शर्माले सेन्ट जेभियर्सबाट प्रवेशिका तह उत्तीर्ण गरेका हुन्। उनले त्रिभुवन विश्वविद्यालयबाट प्रमाणपत्र तहको अध्ययन पूरा गरेका छन्। त्यसपछि दिल्ली विश्वविद्यालयबाट स्नातक गरेका शर्माले काठमाडौँ विश्वविद्यालयबाट व्यवस्थापनमा स्नातकोत्तर (एमबीए) गरेका छन्।
