काठमाडौं । प्रधानमन्त्री वालेन्द्र शाहले रसुवाको भोटेकोशी नदीमा आएको बाढीबाट उत्पन्न संकट समाधान तथा खोज, उद्धार र राहत कार्यबारे सुरक्षा निकायका प्रमुखहरूसँग छलफल गरिरहेका छन्।
प्रधानमन्त्री शाहले सोमबार केहीबेरअघि प्रधान सेनापति अशोकराज सिग्देलसँग भेट गरी बाढी प्रभावित क्षेत्रमा हालसम्म भएका खोज, उद्धार, राहत तथा व्यवस्थापनका कार्यबारे ब्रिफिङ लिएका छन्।
प्रधान सेनापतिसँगको छलफलपछि प्रधानमन्त्री शाहले सशस्त्र प्रहरी बल, नेपालका महानिरीक्षक नारायणदत्त पौडेलसँग पनि बाढी प्रभावित क्षेत्रको अवस्थाबारे ब्रिफिङ लिने कार्यक्रम रहेको छ। त्यसैगरी उनले नेपाल प्रहरीका महानिरीक्षक दानबहादुर कार्कीसँग पनि सोमबारै आवश्यक जानकारी लिने जनाइएको छ।
भोटेकोशी नदीमा आएको बाढीका कारण रसुवामा ठूलो जनधनको क्षति भएको छ। प्रभावित क्षेत्रमा खोज तथा उद्धार, राहत वितरण र व्यवस्थापनका कार्यलाई थप प्रभावकारी बनाउन प्रधानमन्त्री शाहले सुरक्षा निकायका प्रमुखहरूसँग आवश्यक जानकारी लिइरहेका हुन्।
