नुवाकोट । गत भदौ १० गते त्रिशूली नदीमा आएको भीषण बाढीका कारण त्रिशूली क्षेत्र जलमग्न हुँदा स्थानीय जनजीवनसँगै सरकारी तथा निजी सम्पत्तिमा ठूलो क्षति पुगेको छ। बाढीको चपेटामा परेको नुवाकोटस्थित कृषि विकास बैंकको त्रिशूली ढुङ्गे शाखा डुबानमा परेपछि बैंकमा रहेको ठूलो परिमाणको नगद, सर्वसाधारणका बहुमूल्य गहना तथा महत्त्वपूर्ण कागजातको सुरक्षालाई लिएर गम्भीर चिन्ता उत्पन्न भएको थियो।
तर, सुरक्षा निकायको निरन्तर खटाइ र बैंक प्रशासनसँगको प्रभावकारी समन्वयपछि बैंकभित्र सुरक्षित रहेको ठूलो धनमाल सफलतापूर्वक उद्धार गरिएको छ।
प्रहरीका अनुसार आइतबार करिब आठ घण्टासम्म सञ्चालन गरिएको जटिल खोज तथा उद्धार अभियानका क्रममा बैंकको लकर तथा ढुकुटीबाट करिब ५० करोड रुपैयाँ बराबरको सुनचाँदी तथा करिब डेढ करोड रुपैयाँ नगद सुरक्षित रूपमा बरामद गरिएको हो। उद्धार गरिएका सबै सामग्री सुरक्षित स्थानमा स्थानान्तरण गरी कडा सुरक्षा घेराभित्र राखिएको प्रहरीले जनाएको छ।
नगद तथा सुनचाँदीसँगै बैंकका संवेदनशील तथा महत्त्वपूर्ण सरकारी र ग्राहकसम्बन्धी कागजातसमेत सुरक्षित गरिएको छ। बाढीको लेदो र पानीले भरिएको भवनभित्र प्रवेश गरी ढुकुटीसम्म पुगेर सामग्री निकाल्नु उद्धार टोलीका लागि चुनौतीपूर्ण बनेको थियो।
बाढी आएपछि बैंकमा सुरक्षित राखिएका धनमाल चोरी वा नष्ट हुन सक्ने जोखिम बढेको थियो। यस्तो अवस्थामा सुरक्षा निकाय र बैंक प्रशासनको संयुक्त पहलमा सञ्चालन गरिएको विशेष उद्धार अभियानले सम्भावित ठूलो वित्तीय क्षति रोक्न सफल भएको हो।
विपत्तिको कठिन परिस्थितिमा सुरक्षाकर्मीले देखाएको तदारुकता, साहस र समन्वयबाट बैंकका ग्राहक तथा स्थानीय बासिन्दामा राहतको अनुभूति भएको छ। उद्धार गरिएका सम्पूर्ण नगद, सुनचाँदी तथा कागजातलाई हाल सुरक्षित स्थानमा राखिएको जनाइएको छ।
