काठमाडौं । नेपालका दर्जनभन्दा बढी वाणिज्य बैंकका प्रमुख कार्यकारी अधिकृत (सीईओ)हरू हाल स्पेनको बार्सिलोना शहरमा उच्चस्तरीय नेतृत्व तथा व्यवस्थापनसम्बन्धी तालिममा सहभागी भएका छन् ।
नेपाल बैंकर्स संघ को समन्वयमा आयोजित एक साता लामो उक्त प्रशिक्षण कार्यक्रम बार्सिलोनास्थित बार्सिलोना स्कूल अफ म्यानेजमेन्ट मा सञ्चालन भइरहेको हो ।
‘अप्लाइड न्यूरोसाइन्स एन्ड लिडरसिप’ शीर्षकमा केन्द्रित तालिममा सहभागी सीईओहरूले आधुनिक नेतृत्व शैली, निर्णय प्रक्रियामा स्नायु विज्ञानको प्रयोग तथा बदलिँदो विश्व बैंकिङ परिदृश्यबारे अध्ययन गरिरहेका छन् ।
कार्यक्रममा हार्वर्ड विश्वविद्यालय को कन्टिन्युइङ एजुकेसन विभाग, नर्थवेस्टर्न विश्वविद्यालय को केलोग स्कूल, आईईएसई बिजनेस स्कूल र आईईएसएडी बिजनेस स्कूल लगायतका विश्वप्रसिद्ध शैक्षिक संस्थाहरूको संलग्नता रहेको जनाइएको छ ।
यो प्रशिक्षण सम्बन्धित बैंकहरूको लगानीमा नेपाल बैंकर्स संघ ले आयोजना गरेको हो । यसको उद्देश्य नेपाली बैंकिङ क्षेत्रको नेतृत्व तहलाई अन्तर्राष्ट्रिय अनुभव दिलाउनु तथा आधुनिक व्यवस्थापकीय सीप विकास गर्नु रहेको बताइएको छ ।
सहभागी सीईओहरूले तालिमले नेपालको वित्तीय क्षेत्रमा नयाँ तथा वैज्ञानिक व्यवस्थापकीय अभ्यास भित्र्याउन सहयोग पुग्ने विश्वास व्यक्त गरेका छन् ।
गत साता बार्सिलोना प्रस्थान गरेको टोलीको तालिम आज (शुक्रबार) सम्पन्न हुँदैछ भने सीईओहरू भोलि (शनिबार) स्वदेश फर्कने कार्यक्रम रहेको छ ।
