काठमाडौं — इस्लामिक रिभोल्युशनरी गार्ड्स कोर (आईआरजीसी) ले पछिल्लो २४ घण्टामा तेल ट्यांकर, कन्टेनर जहाज तथा अन्य व्यावसायिक पोतसहित ३५ वटा जहाजले अनुमति लिएर होर्मुज जलडमरूमध्य पार गरेको जनाएको छ।
बीबीसी पर्शियनका अनुसार आईआरजीसीको जनसम्पर्क विभागले जारी गरेको विज्ञप्तिमा समुद्री आवागमन र विश्वव्यापी व्यापार निरन्तर सञ्चालन हुन सुरक्षित जलमार्ग सुनिश्चित गरिएको उल्लेख गरिएको छ।
यसअघि पर्शियन गल्फ वाटरवे म्यानेजमेन्ट अथोरिटी ले एक नक्सा सार्वजनिक गर्दै ‘होर्मुज जलडमरूमध्य व्यवस्थापन निगरानी क्षेत्र’ घोषणा गरेको थियो।
उक्त क्षेत्र जलडमरूमध्यको पूर्वमा ईरानको माउन्ट मुबारक र संयुक्त अरब इमिरेट्स को फुजैरालाई जोड्ने रेखादेखि पश्चिममा ईरानको क़ेश्म द्वीप र यूएईको उम्म अल क्वैनसम्म फैलिएको बताइएको छ।
यसैबीच, मार्को रुबियो ले ईरानले होर्मुज जलडमरूमध्यमा शुल्क (टोल) लागू गरे संयुक्त राज्य अमेरिका र ईरान बीच कूटनीतिक समझदारी सम्भव नहुने चेतावनी दिएका छन्।
बीबीसी उर्दूका अनुसार पत्रकारहरूसँग कुरा गर्दै रुबियोले विश्वका कुनै पनि मुलुक यस्तो व्यवस्थाको पक्षमा नरहेको र यसलाई अस्वीकार्य मानिने बताएका हुन्।
रायटर्सका अनुसार रुबियोले ईरान यही दिशामा अघि बढे त्यसले अमेरिका–ईरान सम्बन्धलाई थप जटिल बनाउने मात्र नभई विश्वव्यापी संकट निम्त्याउन सक्ने र यस्तो कदम पूर्ण रूपमा गैरकानुनी हुने बताएका छन्।
