काठमाडौँ । प्रहरीको किर्ते प्रतिवेदन र सिफारिस पत्रका आधारमा दुर्घटना बीमाबाट ८१ लाख रुपैयाँ ठगी भएको तथ्य बाहिर आएको छ ।
अनुसन्धानले यो योजनामा प्रहरी हवल्दारदेखि बीमा कम्पनीका कर्मचारीसम्मको संगठित मिलेमतो रहेको देखाएको छ ।
जिल्ला सरकारी वकिल कार्यालय काठमाडौँले पर्सा घर भई काँडाघारी बस्ने ४४ वर्षीय हरि बुढाथोकीसहित ३१ जनाविरुद्ध लिखतसम्बन्धी कसुरमा मुद्दा दायर गरेको छ । अदालतले मुख्य अभियुक्त बुढाथोकीलाई दुई लाख रुपैयाँ धरौटीमा छाड्न आदेश दिएको छ भने बाँकी ३० जना अझै फरार छन् ।
प्रहरीका अनुसार बुढाथोकीले नयाँ बानेश्वर वृत्तका प्रहरी निरीक्षकको नक्कली हस्ताक्षर प्रयोग गरी २९ वटा झुट्टा दुर्घटना सिफारिस तयार पारे । ती कागजात देखाएर नेपाल माइक्रो इन्स्योरेन्सबाट दाबी भुक्तानी लिन उनले सवारी धनी तथा चालकहरूसँग मिलेर नक्कली दुर्घटनाका विवरण खडा गरेका थिए ।
अनुसन्धानले बीमा कम्पनीका कर्मचारी विकेश कुँवर र प्रहरी हवल्दार ध्रुव शाही योजनाका मुख्य सहयोगी भएको देखाएको छ । प्रति सिफारिस तीन लाखका दरले २७ दाबीबाट ८१ लाख रुपैयाँ हिनामिना गर्ने तयारी गरिएको निष्कर्ष प्रहरीको छ । किर्ते हस्ताक्षर भएको पत्र भेटिएपछि गत भदौमा घटना खुल्यो र असोजमा बुढाथोकी पक्राउ परेका थिए ।
सरकारी वकिलले मुलुकी अपराध संहिता अनुसार बिगो असुल, सात वर्षसम्म कैद र जरिवानाको माग गरेको छ । प्रहरीले बरामद गरेका नक्कली सिफारिस र बयानलाई मुख्य प्रमाणका रूपमा अदालतमा पेस गरेको छ । यो प्रकरणले बीमा क्षेत्रमा मौलाउँदै गएको संगठित ठगीको जोखिम उजागर गरेको छ ।
