काठमाडौं । फर्निचर तथा फर्निसिङ व्यवसायमा आवद्ध व्यवसायीहरुले यस क्षेत्रलाई धरासायी हुनबाट जोगाउन सरकारलाई आग्रह गरेका छन् । नेपाल फर्निचर तथा फर्निसिङ संघको २४औं वार्षिक साधारण सभाका सहभागीहरुले काठका फर्निचर उत्पादनका लागि आवश्यक नीति नबन्दा फर्निचर तथा फर्निसिङ व्यवसाय धरासायी अवस्थामा पुगेको बताएका हुन् ।
संघका अध्यक्ष दिनेश अग्रवालले फर्निचर निर्माणका लागि आवश्यक पर्ने कच्चा पदार्थ–काठ तथा काठ जन्य वस्तु कुहिएर खेर गइरहेको अवस्थामा समेत सरकारले चासो नदिएको गुनासो गरे ।
काठजन्य वस्तुको लिलामी प्रकृयामा फर्निचर तथा फर्निसिङ व्यवसायीलाई सहभागी हुने किसिमको नीति निर्माण गर्न सरकारसमक्ष उनले आग्रह गरे । व्यवसायीका समस्या समाधान गर्न सरकारलाई पटकपटक आह्वान गर्दा समेत सरकारले नीति निर्माणमा ध्यान नदिएको अग्रवालको भनाई छ ।
प्लास्टिक, फर्निचर, कार्पेट, फ्लोरिङका सामग्री उत्पादनमा नेपाल आत्मनिर्भर हुने चरणमा पुगे पनि काठका फर्निचर उत्पादनका लागि आवश्यक नीति नबन्दा र व्यवसायीलाई काठ लिलामीमा सहभागी नगराउँदा आयातित कच्चा पदार्थमा निर्भर हुनु पर्ने बाध्यता रहेको अध्यक्ष अग्रवालले बताए ।
नेपाल फर्निचर तथा फर्निसिङ व्यवसायी महासंघ अध्यक्ष सुजिल श्रेष्ठले फर्निचर व्यवसाय मूलतः काठमा आधारित व्यवसाय रहेका कारण काठको सहज पहुँचको सुविधा मिलाउन सरकारलाई आग्रह गरे ।
काठबाट निर्मित फर्निचरका लागि नेपालमै कच्चापदार्थ उपलब्ध भए पनि आवश्यक नीतिको अभावमा मुलुक अन्य देशमा भर पर्ने अवस्था बनेको बताउँदै उनले व्यवसायीहरुलाई उत्पादनको स्तर गुणस्तरीय बनाउन समेत आग्रह गरे ।
स्वदेशी फर्निचरको प्रयोग बढाउने उद्देश्यले उनले हरेक सरकारी कार्यालयमा स्वदेशी फर्निचरको प्रयोग गर्न र स्वदेशी उत्पादनलाई नै प्राथमिकतामा राख्न समेत अनुरोध गरे । ‘पछिल्लो समयमा व्यवसाय दर्ता नगरी सञ्चालन गर्ने क्रम बढेको छ,’ श्रेष्ठले भने ।
यसको समाधानका लागि जिल्लाका फर्निचर तथा फर्निसिङ व्यवसायी संघहरुले समन्वय गर्नुपर्ने उनको भनाई छ । दर्ता नगरी अनलाइनमार्फत हुने व्यापार पछिल्लो समयमा बढ्दै गएको बताएका उनले यसको नियमनका लागि पनि आग्रह गरे ।
नेपाल चेम्बर अफ कमर्सका अध्यक्ष राजेन्द्र मल्लले फर्निचर तथा फर्निसिङ व्यवसायीले भोग्दै आएका समस्या समाधानका निमित्त नेपाल चेम्बर अफ कमर्सले सरकारी तथा निजी तबरबाट सहयोग गर्न तयार रहेको बताए ।
नेपालमा आफ्नो उत्पादनको ब्रान्डिङ गर्ने, कम्पनीको लोगो बनाउने कार्य भएको पाइँदैन । जसकारण स्वदेशमै उत्पादित सामग्री समेत भारतबाट आयात भएको हो कि भन्ने किसिमको आशंका बढ्दै गएको सत्यलाई बाहिर ल्याउँदै अध्यक्ष मल्लले फर्निचर तथा फर्निसिङ व्यवसायीहरुलाई ब्रान्डिङ र लोगो निर्माणमा काम गर्न सुझाएका छन् ।
पछिल्लो समयमा बैंक तथा वित्तीय संस्थाहरुले ब्याजदर घटाउन सुरु गरेका छन् । जुन उद्योगी तथा व्यवसाय सञ्चालनका लागि सहज हुने बताउँदै उनले बैंकबाट कर्जा लिँदा संयुक्त रुपमा लिन समेत सुझाव दिए ।
यसका साथै उनले व्यवसायीहरु समस्यामा पर्नुको कारण उधारो कारोबार बढ्दै जानुलाई इङ्गित गरेका छन् । व्यवसायीहरुलाई डिजिटल रुपमा कारोबार गर्न पनि उनले प्रोत्साहन गरेका छन् ।
यस्तै, काठ लिलामी प्रकृयामा सहभागी हुनका लागि कार्यविधि बनाएर सरकार समक्ष पेश गर्न र सामूहिक दबाब सिर्जना गर्न सुझाव दिएका उनले पछिल्लो समयमा निर्माण क्षेत्र सुस्ताउँदै जाँदा फर्निचर तथा फर्निसिङ उद्योग समेत सुस्ताएको र सबै एकजुट भएर समस्या समाधानमा लाग्नुपर्ने बताए ।
देशको अर्थतन्त्र गम्भिर अवस्थामा रहेको र फर्निचर तथा फर्निसिङ व्यवसाय समेत घट्दो क्रममा रहेको व्यवसायीहरुको धारणा छ । करिब १ लाख ५० हजार मानिसहरुलाई प्रत्यक्ष रोजगारी प्रदान गर्दै आएको र अर्थतन्त्रमा ठूलो योगदान पुर्याउने फर्निचर तथा फर्निसिङ क्षेत्रको समग्र विकासका लागि सरकारले नीतिगत सहयोग गर्नुपर्ने उनीहरुको माग छ ।
