काठमाडौं । सिटिजन लाइफ इन्स्योरेन्सको आईपीओमा बाँडफाँटको मिति तय भएको छ । कम्पनीको सेयर निष्कासन तथा बिक्री प्रबन्धक एनआइएमबि एस क्यापिटलका अनुसार बिहिबार अर्थात भदौ २८ गते दिउँसो २ बजे बाँडफाँट हुनेछ ।

आईपीओ ६ लाख १४ हजार भन्दा बढीको हात रित्तो हुने भएको छ । सिडिएसका अनुसार अन्तिम दिनसम्म १५ लाख १४ हजार २८२ जनाले १ करोड ६८ लाख २६ हजार ८८० कित्ताका लागि आवेदन दिएका थिए । जस मार्फत ४ अर्ब १० करोड ५७ लाख ५८ हजार ७२० रुपैयाँ संकलन भएको थियो ।

भदौ १५ गतेदेखि कम्पनीले प्रिमियम मूल्यमा आईपीओ जारी गरेको हो ।कम्पनीले सर्वसाधारणलाई प्रतिसेयर १०० रुपैयाँ अङ्कित मूल्यमा १४४ रुपैयाँ प्रिमियम थप गरी कुल २४४ रुपैयाँमा आइपीओ जारी गरेको थियो । कम्पनीले आफ्नो जारी पुँजी ३ अर्ब ७५ करोड रुपैयाँको ३० प्रतिशतका दरले हुन आउने १ अर्ब १२ करोड ५० लाख रुपैयाँ बराबरको १ करोड १२ लाख ५० हजार कित्ता सेयर जारी गर्न अनुमति पाएको थियो। सोमध्ये ५ प्रतिशतले हुन आउने ५ करोड ६२ लाख ५० हजार रुपैयाँ बराबरको ५ लाख ६२ हजार ५०० कित्ता प्रतिसेयर १०० रुपैयाँमा कम्पनीका कर्मचारीहरूका लागि निष्कासन गरिसकेको छ ।

बाँकी १ अर्ब ६ करोड ८७ लाख ५० हजार रुपैयाँ बराबरको १ करोड ६ लाख ८७ हजार ५०० कित्ता सेयरको १० प्रतिशत अर्थात् ११ लाख २५ हजार कित्ता वैदेशिक रोजगारीमा गएका नेपालीका लागि तथा ५ लाख ६२ हजार ५०० कित्ता सामूहिक लगानी कोषहरूका लागि निष्कासन गरी बाँडफाँट गरिसकेको छ ।

कम्पनीले बाँकी रहेको ९० लाख कित्ता सेयर सर्वसाधारणमा निष्कासन गरेको थियो । कम्पनीको आइपीओ ९ लाख आवेदनले १०।१० कित्ताका दरले हात पार्नेछन् । जसमा ६ लाख १४ हजार २८२ जनाको हात खालि हुने भएको छ ।

आईपीओ निष्कासनका लागि गराएको रेटिङमा इक्रा नेपालले कम्पनीलाई इक्राएनपी इस्यूअर रेटिङ त्रिपल बी प्रदान गरेको छ । यो भनेको कम्पनीको वित्तीय दायित्व समयमा नै पुरा गर्ने सम्बन्धमा मध्यम रूपमा सुरक्षित रहेको सङ्केत गर्दछ । कम्पनीको सेयर निष्कासन तथा बिक्री प्रबन्धक एनआइएमबि एस क्यापिटल लिमिटेड रहेको छ ।

मिती : २६ भाद्र २०८०, मंगलवार १६:४० बजे प्रकाशित