नेपाली कांग्रेसका महामन्त्री एवं सांसद गगन थापाले नक्कली भुटानी शरणार्थी प्रकरणलाई लिएर सरकारको प्रशंसा गरेका छन् । उनले यस प्रकरणमा जोसुकै संलग्न भएपनि कारबाहीको दायरमा लाउन सरकारले दह्रो गरी खुट्टा टेक्नुपर्नेमा बताए ।

प्रतिनिधिसभामा बुधबार विनियोजन विधेयकको सिद्धान्त र प्राथमिकमाथिको छलफलमा सहभागी हुँदै सांसद थापा भने, ‘म सरकारको प्रशंसा गर्छु । प्रधानमन्त्री र गृहमन्त्रीलाई यो सन्दर्भमा मेरा तर्फबाट हार्दिक बधाई छ । संलग्न जो सुकै होस् , जुनसुकै दलको, तहको, ओहदाको होस्, कारबाहीको दायरामा आउनै पर्छ ।’

सांसद थापाले अनुसन्धान निष्पक्ष हुनुपर्नेमा पनि जोड दिए । पछिल्लो सयम बाक्लिएको शीर्ष नेताहरुको भेटवार्ताप्रति इंगित गर्दैै उनले भने, ‘बजारको हल्लाले अनुसन्धान प्रभावित नहोस् । कुनै भेटघाटले प्रभावित नहोस् । मेरो आग्रह छ, अुसन्धान फ्रि र फेयर होस् ।’

निर्दोष फस्न नहुने तर दोषी जोसुकै भएपनि कारबाहीको भागीदार बनाइनुपर्ने सांसद थापाले बताए । यो शरणार्थी प्रकरणको अनुसन्धानमा सरकारले दह्रो खुट्टा टेक्यो भने आगामी दिनमा सुशासनको नारा लाउन सुहाउने उनले बताए । ‘निर्दोष कोही नपरोस् । तर दोषी छ भने तेता होस् कि नाता होस् एउटा पनि नछुटोस्’, थापाले भने, ‘यो अनुसन्धानमा सरकारले दह्रो खुट्टा टेक्यो भने आगामी दिनमा सुशासनको नारा लाउन सक्छ ।

यसअघि प्रधानमन्त्री पुष्पकमल दाहाल ‘प्रचण्ड’ले भ्रष्टाचार काण्डमा सरकार कसैको दबाबमा नपर्ने र नक्कली शरणार्थी प्रकरणको ‘ट्रेलर’मात्रै अहिले देखिएको र पूरा फिल्म देखाउनै बाँकी रहेको बताएका थिए । उक्त सन्दर्भलाई लिएर सांसद थापाले भने, ‘तपाईँको फिल्म चल्छ । हाउसफूल हुन्छ । तर अनुसन्धान डगमगाए हल खाली हुन्छ । अब अनुसन्धान गरेँ भनेर मात्र हुँदै । नागरिकलाई विश्वास लाग्नुपर्छ ।’

सुशासनका विषयमा बल्ल त्यसपछि अरु काम गर्न सकिने सांसद थापाको भनाइ थियो ।

मिती : २७ बैशाख २०८०, बुधबार १४:१६ बजे प्रकाशित