काठमाडौंमा जारी एसीसी प्रिमियर कपमा अपराजित रहेको नेपालले सेमिफाइनलमा कुवेतसँग प्रतिस्पर्धा गर्ने भएको छ । मूलपानी क्रिकेट मैदानमा बिहीबार भएको खेलमा कुवेतले हङकङलाई ३० रनले पराजित गरेसँगै नेपालको प्रतिस्पर्धी कुवेत हुने भएको हो ।
समूह ‘ए’ को विजेताको रुपमा रहेको नेपाल र समूह ‘बी’ को उपविजेता कुवेतबीच सेमिफाइनलमा प्रतिस्पर्धा हुने र दोस्रो सेमिफाइनल खेलमा भने ओमान र युएईबीच भिड्ने छन् ।
बिहीबार नै भएको नेपाल र कतारबीचको खेलमा नेपालले कतारलाई ६८ रनले पराजित गरेको छ । एसिया कपमा भारत र पाकिस्तानसँग खेल्ने लक्ष्य बनाएको नेपाल त्रिवि क्रिकेट मैदान कीर्तिपुरमा ४०.३ ओभरमा १ सय ५७ रनमा अलआउट भएको थियो ।
तर जवाफमा आएको कतारलाई पनि नेपालको उत्कृष्ट बलिङको सामना गर्न सजिलो भएन । नेपालले कतारलाई २५.१ ओभरमै ८९ रनमा अलआउट गर्यो । कतारबाट जाहिर इब्राहिम र खुराम सेहजादले समान १५ र अमिर फारुकले १४ रन बनाउनुबाहेक अन्यले दोहोरो स्कोर बनाउन सकेनन् । सन्दीप लामिछानेले ५ विकेट लिए । सोमपाल कामीले ३ र ललित राजवंशीले २ विकेट लिए ।
यसअघि सन्दीप र ललितले अन्तिम विकेटमा ४५ रनको साझेदारी गरेपछि नेपालको स्कोर हेर्न लायक बनेको थियो । सन्दीपले नेपालबाट सर्वाधिक अविजित ४२ रन बनाए । ललितले १७ बल खेली १ रन बनाए । कुशल भुर्तेलले २, भीम सार्की ६, आसिफ शेख १९ र रोहित २७ रनमा आउट भए ।
कुशल मल्लले ३ रनमात्र बनाउन सके । सोमपालले ११ रन बनाए । दीपेन्द्रसिंह ऐरीले १२ रनमात्र बनाउन सके । गुलशन झा ७ रनमा आउट भए । कतारबाट अमिर फारुकले ४ र ओबाइस अहमदले ३ विकेट लिए । ज्ञान मुनाविराले २ र इक्रामुल्लाह खानले १ विकेट लिए ।
उपाधि दाबेदार नेपाल शनिबारको सेमिफाइनलमा कुवेतलाई हराएर फाइनल खेल्ने योजनामा छ । पछिल्लो समय राम्रो प्रदर्शन गरिरहेको नेपालले एसीसी प्रिमियर कपको उपाधि जित्दै एसीया कपका लागि छनोट हुने अपेक्षा गरिएको छ ।
अर्थ सन्जाल