नेपाल मजदुर किसान पार्टीका सांसद प्रेम सुवालले मिटरब्याजी पीडित र लघुवित्त पीडितमाथि गरिएको दमन संविधानमा उल्लेख वाक स्वतन्त्रता र शान्तिपूर्ण भेला हुने हकको हनन् हो भनेका छन् ।
मंगलबारको प्रतिनिधिसभा बैठकमा सांसद सुवालले भने, ‘काठमाडौं रत्नपार्कमा भेला भएका मिटरब्याज पीडित र इनरुवामा भेला भएका लघुवित्त ऋण पीडित जनतामाथि लाठी प्रहार र दमन गरेको संविधानमा उल्लेख वाक स्वतन्त्रता र शान्तिपूर्ण भेला हुने हकको हनन् हो ।’
सांसद सुवालले सोमबार मिटरब्याजी पीडितहरुमाथि भएको प्रहरी धरपकडबारे संसदलाई तत्काल जानकारी गराउन सरकारसँग माग पनि गरे । उनले प्रधानमन्त्री पुष्पकमल दाहाल प्रचण्ड र गृहमन्त्री नारायणकाजी श्रेष्ठले संसदमा आएर मिटरब्याज पीडित र लघुवित्त पीडितहरुमाथि प्रहरीले लाठी प्रहारसहितको दमन गर्नुको कारणबारे जवाफ दिनुपर्ने बताए ।
सोमबार मिटरब्याजी पीडितहरुमाथि भएको प्रहरी धरपकड गरेको थियो । त्यसक्रममा केही पीडितहरु घाइतेसमेत भएका थिए ।
