वित्तीय स्थायित्व सुदृढीकरण गर्ने उद्देश्यले नेपाल राष्ट्र बैंकले बैंक तथा वित्तीय संस्था गाभ्ने/गाभिने तथा प्राप्ति सम्बन्धी प्रक्रिया सुरु गराएपश्चात् फागुन मसान्तसम्म २५७ बैंक तथा वित्तीय संस्थाहरु मर्जर प्रक्रियामा सामेल भएका छन् ।

राष्ट्र बैंकको मर्जर नीतिका कारण १८४ बैंक तथा वित्तीय संस्थाको अस्तित्व समाप्त भएको छ । १८४ संस्थाहरुको इजाजत खारेज हुन गई ७३ संस्था कायम भएको राष्ट्र बैंकले जनाएको छ।

राष्ट्र बैंकका अनुसार कुल ७५३ स्थानीय तहमध्ये २०७९ फागुनसम्म ७५२ तहमा वाणिज्य बैंकहरुका शाखा विस्तार भएका छन् । २०७८
फागुनसम्म ७५० स्थानीय तहमा वाणिज्य बैंकहरुका शाखा विस्तार भएका थिए ।

राष्ट्र बैंकबाट इजाजतप्राप्त बैंक तथा वित्तीय संस्थाहरुको संख्या २०७९ फागुनमसान्तमा १२० रहेको छ । यसमध्ये २१ वाणिज्य बैंक, १७ विकास बैंक, १७ वित्त कम्पनी, ६४ लघुवित्त वित्तीय संस्था र १ पूर्वाधार विकास बैंक सञ्चालनमा रहेका छन् ।

बैंक तथा वित्तीय संस्थाहरुको शाखा संख्या २०७९ असार मसान्तमा ११,५२८ रहेकोमा २०७९ फागुन मसान्तमा ११,६२९ पुगेको छ ।

राष्ट्र बैंकका अनुसार २०६९ को असार मसान्तसम्ममा नेपालमा वाणिज्य बैंकको सङ्ख्या ३२ थियो । पछिल्लो १० वर्षमा त्यो सङ्ख्या २१ मा झरेको छ । हालसम्म ११ वाणिज्य बैंकको अस्तित्व सकिएको छ ।

मिती : १ बैशाख २०८०, शुक्रबार १२:५३ बजे प्रकाशित