अर्थमन्त्री डा. प्रकाशशरण महतले ऋण लिएर तिर्दिनँ भन्न नपाइने बताएका छन् । मंगलबार नेपाल उद्योग वाणिज्य महासंघको ५७ औँ वार्षिक साधारणसभामा बोल्दै अर्थमन्त्री महतले कर्जा लिएपछि नतिर्ने भन्न नपाइने बताएका हुन् ।

उनले भने, ‘अहिले कर्जा लिएर तिर्दैनौं भन्ने अभियान चलेको छ । कर्जा लिने अनि नतिर्ने यो हुने सक्दैन ।’ ऋण तिर्न नसक्नेलाई सरकारले सहुलियत दिने पनि उनले बताए । उनले ब्याजदरका विषयमा सरकारले राष्ट्र बैंकसँगछलफल गरिरहेको बताए ।

अर्थमन्त्री महतले अर्थतन्त्र चलायमान बनाउन सरकार सम्पूर्ण रुपमा केन्द्रित हुने प्रतिबद्धता समेत व्यक्त गरेका छन् । चाँडै नै लगानीका समस्या हल गरेर अर्थतन्त्र चलायमान गराउने दिशामा सरकार केन्द्रित रहेको उनको भनाइ छ ।

अर्थतन्त्र सुधारका लागि सरकारले अल्पकालीन र दीर्घकालीन नीति बनाउन लागेको जानकारी उनले दिए। ‘हामी सबैमा कमीकमजोरी छ। त्यसलाई सुधार गरेर अघि बढनुपर्छ । सरकारका पनि कमीकमजोरीहरू रहेका छन्। सरकारले समयमा नै खर्च गर्न सकेको छैन। त्यो स्वीकार गर्नुपर्छ। समग्र सरकार र निजी क्षेत्र सबैतिर समस्या रहेको छ।’

उनले निजी क्षेत्र व्यापार मात्र भन्दा पनि उत्पादन क्षेत्रमा लगानीतर्फ केन्द्रित हुनुपर्ने आवश्यकता औल्याए । मुलुकका हरेक संयन्त्रमा समस्या रहेको भन्दै सबैले सुधार गर्न आवश्यक रहेको उनको भनाइ छ।

अर्थमन्त्री डा. महतले मुलुकको अर्थतन्त्र सुधार गर्नको लागि निजी क्षेत्रले व्यापारमा मात्रै नभइ उद्योग व्यवसायमा लगानी केन्द्रित गर्नुपर्ने आवश्यकता रहेको बताएका हुन्।

उनले अन्तर्राष्ट्रिय परिस्थिति राम्रो र युद्धको अन्त्य हुनसके नेपालको आर्थिक विकास, रूपान्तरण, पुँजी विकास र उद्योग व्यवसायमा लगानीका समस्या समाधान गरी अर्थतन्त्रमा सकारात्मक सुधार हुने विश्वास व्यक्त गरे।

मिती : २८ चैत्र २०७९, मंगलवार १४:४४ बजे प्रकाशित