बाराही हाइड्रोपावर पब्लिक लिमिटेडको आईपीओमा मागभन्दा २७ गुणा बढी आवेदन परेको छ । यसरी हेर्दा कम्पनीको आईपीओ प्राप्त गर्न भाग्यकै भर पर्नुपर्ने देखिन्छ ।
आज अन्तिम दिनसम्म कम्पनीको आईपीओमा १२ लाख १६ हजार १५३ जनाको आवेदन परेको सीडीएससीले जनाएको छ । उक्त आवेदकबाट कुल १ करोड ३८ लाख ७१ हजार २२० कित्ताका लागि आवेदन परेको हो । जुन मागभन्दा २६.९२ गुणाले बढी हो।
मागभन्दा बढी आवेदन परेकै कारण यो आईपीओ गोलाप्रथाबाट बाँडफाँट हुनेछ। जसअनुसार गोलप्रथाबाट भाग्यमानी ५१ हजार ५२२ जनाले १० कित्ताका दरले सेयर पाउनेछन्।
कम्पनीले गत मंसिर २१ गतेदेखि सर्वसाधारणका लागि १०० अंकित दरका कुल ५ लाख ५४ हजार कित्ता आईपीओ बिक्री खुला गरेको थियो। जसमा यसअघि आयोजना प्रभावित स्थानीयका लागि जारी गरिएको आईपीओमा बिक्री हुन बाँकी रहेको १ लाख ४ हजार कित्ता सेयर पनि समावेश गरिएको थियो।
कुल कित्तामध्ये मध्ये ५ प्रतिशतले हुन आउने २७ हजार कित्ता सामूहिक लगानी कोष र २ प्रतिशतले हुन आउने ११ हजार ८० कित्ता सेयर कर्मचारीका लागि छुट्याइएको छ। बाँकी ५ लाख १५ हजार २२० कित्तामा सर्वसाधारणले खरिद आवेदन दिन पाउने व्यवस्था गरिएको थियो।
यो आईपीओको बिक्री प्रबन्धकमा एनआईबिएल एस क्यापिटल रहेको छ।
अर्थ सन्जाल