काठमाडौं । नेपाल धितोपत्र बोर्डमा पाँच कम्पनीले प्राथमिक सार्वजनिक निष्कासन (आईपीओ) जारी गर्न अनुमति माग्दै आवेदन दिएका छन्। यी कम्पनीहरूले प्रतिकित्ता एक सय रुपैयाँ अंकित मूल्यमा सर्वसाधारणका लागि सेयर निष्कासन गर्ने प्रस्तावसहित बोर्डमा आवेदन दिएका हुन्।
बोर्डमा आवेदन दिने कम्पनीमध्ये इन्द्रेणी समरुम फर्म लिमिटेडले आठ लाख पचहत्तर हजार कित्ता आईपीओ निष्कासनका लागि अनुमति मागेको छ। त्यस्तै, बैदिक इन्भेष्टमेन्ट कम्पनीले २८ लाख ३५ हजार कित्ता र नेक्सजेन म्यानेजमेन्ट एन्ड इक्विटी सल्युसनले १२ लाख ५० हजार कित्ता सेयर निष्कासन गर्ने प्रस्ताव गरेका छन्।
यसैगरी, सौर्य कृषि कम्पनीले २० लाख कित्ता आईपीओ जारी गर्न अनुमति मागेको छ। मध्यपुर अस्पतालले पनि २८ लाख कित्ता सेयर सर्वसाधारणका लागि निष्कासन गर्ने तयारीसहित बोर्डमा आवेदन दिएको छ।
पाँचवटै कम्पनीले प्रतिकित्ता एक सय रुपैयाँ अंकित मूल्यमा सेयर निष्कासन गर्ने प्रस्ताव गरेका छन्। बोर्डबाट अनुमति पाएपछि आवश्यक प्रक्रिया पूरा गरी ती कम्पनीले आईपीओ बिक्री खुला गर्नेछन्।
