काठमाडौं । यती पेन्ट्स नेपालले भोटेकोशी बाढी प्रभावितको खोजी, उद्धार तथा राहतका लागि प्रधानमन्त्री दैवी प्रकोप उद्धार कोषमा ११ लाख ११ हजार १ सय ११ रुपैयाँ सहयोग गरेको छ ।
रसुवाको भोटेकोशीमा आएको बाढीका कारण रसुवा, नुवाकोट, धादिङ, गोरखा, तनहुँलगायत जिल्लामा ठूलो मानवीय तथा भौतिक क्षति भएपछि प्रभावित नागरिकको सहयोगका लागि सामाजिक उत्तरदायित्वअन्तर्गत रकम प्रदान गरिएको कम्पनीले जनाएको छ ।
कम्पनीका अध्यक्ष झलकबहादुर केसीले प्राकृतिक विपद्बाट प्रभावित क्षेत्रमा राहत तथा पुनःस्थापनाका लागि सहयोग गरिएको बताए ।
यती पेन्ट्सले बाढीमा ज्यान गुमाउनेप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरेको छ ।
