नयाँ दिल्ली— भारतका केन्द्रीय शिक्षामन्त्रीमा नियुक्त भएका प्रल्हाद जोशीले आफ्नो नयाँ जिम्मेवारी इमानदारी, निष्ठा र समर्पणका साथ निर्वाह गर्ने बताएका छन्।
नियुक्तिपछि सञ्चारकर्मीसँग प्रतिक्रिया दिँदै उनले प्रधानमन्त्री नरेन्द्र मोदीप्रति आभार व्यक्त गर्दै शिक्षा क्षेत्रको विकासलाई प्राथमिकतामा राखेर काम गर्ने प्रतिबद्धता जनाए।
‘प्रधानमन्त्रीले मलाई नयाँ जिम्मेवारी दिनुभएको जानकारी पाएको छु। म यो जिम्मेवारी पूर्ण इमानदारी र निष्ठाका साथ पूरा गर्नेछु। यस विश्वासका लागि प्रधानमन्त्री मोदीप्रति धन्यवाद व्यक्त गर्दछु,’ उनले भने।
जोशीले मोदी सरकारको कार्यकालमा विभिन्न क्षेत्रमा महत्त्वपूर्ण सुधार भएको दाबी गर्दै शिक्षा क्षेत्र पनि त्यसबाट लाभान्वित भएको उल्लेख गरे। उनले पूर्वशिक्षामन्त्री धर्मेन्द्र प्रधानले पछिल्ला केही वर्षमा राष्ट्रिय शिक्षा नीति प्रभावकारी रूपमा कार्यान्वयन गर्न भूमिका खेलेको भन्दै उनको योगदानको प्रशंसा गरे।
उनका अनुसार प्रधानमन्त्री मोदीको नेतृत्वमा शिक्षा प्रणालीलाई थप आधुनिक, गुणस्तरीय र प्रभावकारी बनाउने प्रयास जारी रहनेछ।
धर्मेन्द्र प्रधानको राजीनामापछि रिक्त भएको शिक्षा मन्त्रालयको जिम्मेवारी जोशीलाई दिइएको हो। प्रधानमन्त्रीको सिफारिसमा राष्ट्रपतिले प्रधानको राजीनामा स्वीकृत गरेपछि जोशीलाई आफ्नो विद्यमान जिम्मेवारीसँगै शिक्षा मन्त्रालयको कार्यभार पनि सुम्पिएको बताइएको छ।
यसबीच, धर्मेन्द्र प्रधानको राजीनामापछि सरकार र ‘क्रकोज जनता पार्टी’बीच भएको वार्तामा सहमति जुटेपछि उक्त संगठनले आफ्नो आन्दोलन फिर्ता लिएको घोषणा गरेको छ। त्यससँगै नयाँ शिक्षामन्त्री जोशीसमक्ष शिक्षा क्षेत्रसँग सम्बन्धित समस्या समाधान गर्नु प्रमुख चुनौतीका रूपमा देखिएको छ।
‘पेपर लिक’ प्रकरणको विरोधमा ‘क्रकोज पार्टी’को आह्वानमा ३६ दिनसम्म आन्दोलन भएको थियो भने सामाजिक अभियन्ता सोनम वाङचुकले २८ दिन लामो भोक हड्ताल गरेका थिए। आन्दोलन चर्किएपछि शिक्षामन्त्री प्रधानले राजीनामा दिएको जनाइएको छ।
प्रधानमन्त्री मोदीले पनि ‘पेपर लिक’मा संलग्नमाथि कडा कारबाही गरिने प्रतिबद्धता व्यक्त गर्दै दोषीलाई १ करोड जरिवाना र १० वर्षसम्म कैद सजायको व्यवस्था गर्ने विधेयक संसद्मा प्रस्तुत गरिने बताएका छन्।
