बब्लु अलि अन्सारीलाई १ लाख रुपैयाँ धरौटीमा छाड्ने आदेश

काठमाडौं । सवारी साधनको नक्कली लिखत तयार गरी सरकारी अभिलेख सच्याएको र भ्रष्टाचार गरेको आरोप लागेका बब्लु अलि अन्सारीलाई विशेष अदालतले १ लाख रुपैयाँ धरौटीमा छाड्ने आदेश दिएको छ ।

विशेष अदालतका अध्यक्ष सुदर्शनदेव भट्ट तथा सदस्यहरू हेमन्त रावल र विदुर कोइरालाको इजलासले अन्सारीलाई १ लाख रुपैयाँ नगद धरौटी वा सो बराबरको बैंक जमानत लिई तारिखमा राखेर मुद्दाको पुर्पक्ष गर्न आदेश दिएको हो ।

अन्सारीमाथि राष्ट्रसेवक कर्मचारीहरूसँगको मिलेमतोमा नेपाल सरकार र सार्वजनिक निकायलाई प्राप्त हुने भन्सार महसुल लगायतका राजस्वमा हानि पुऱ्याउने बदनियत राखेको आरोप छ ।