काठमाडाैं । नेपाल टेलिकमको मोबाइल नम्बर प्रयोग गरिरहेका ग्राहकले एकै पटक धेरै व्यक्तिलाई सामूहिक सन्देश (ग्रुप एसएमएस) पठाउन सकिने सुविधा उपलब्ध गराउँदै आएको छ । यो सेवा प्रयोग गरेर एकै पटक दुई हजार, पाँच हजार र १० हजार वटासम्म सामूहिक सन्देश पठाउन सकिन्छ ।
एउटै सन्देश धेरै जनालाई पठाउनु पर्ने अवस्थामा विभिन्न व्यक्ति वा संस्थाहरूले पहिलेदेखि नै नेपाल टेलिकमको यो ग्रुप एसएमएस सेवा उपयोग गरिरहेका छन् । यसरी एकै पटक धेरै जनालाई पठाउन सकिने ग्रुप एसएमएस सेवा हालको सन्दर्भमा समेत निकै नै उपयोगी हुन सक्छ ।
यस अन्तर्गत १ हजार २४३ रुपैयाँमा २ हजार एसएमएस, ३ हजार १०८ रुपैयाँमा ५ हजार एसएमएस र ६ हजार २१५ रुपैयाँमा १० हजार एसएमएस पठाउन सकिने टेलिकमका प्रवक्ता रवीन्द्र मानन्धरले जानकारी दिए ।
यो सेवा प्रयोग गर्नका लागि प्रयोगकर्ताको नाममा रहेको कम्पनीको सिमकार्ड प्रयोग गर्नुपर्नेछ र प्रेषित सन्देशको शब्द तथा भाव लगायतका बारेमा पठाउने व्यक्ति वा संस्था स्वयं पूर्ण जिम्मेवार हुनुपर्ने छ ।
सेवा प्रयोग गर्नका लागि मोबाइल, डेस्कटप वा ल्यापटपबाट groupsms.ntc.net.np लगइन गरी आफूलाई आवश्यक प्याकेज खरिद गर्न सकिने छ ।
ग्राहकले आफ्नो मोबाइलबाट सामूहिक सन्देश पठाउनको लागि आवश्यक नम्बरहरू एक्सेल सिटमार्फत अपलोड गर्नुपर्ने हुन्छ । त्यसपछि एकै पटक धेरै जनालाई सन्देश पठाउन सकिने प्रवक्ता मानन्धरले जानकारी दिए ।
