काठमाडौं। नेपाल राष्ट्र बैंकले ग्लोबल आईएमई बैंकविरुद्ध गलत प्रचार नगर्न आग्रह गरेको छ। बैंकले सम्बद्ध लगानीकर्ता, निक्षेपकर्ता, ग्राहक तथा सरोकारवालालाई ढुक्कसँग नियमित रूपमा बैंकिङ कारोबार गर्न समेत अनुरोध गरेको छ ।
व्यापारी चन्द्र प्रसाद ढकाल अध्यक्ष रहेको ग्लोबल बैंकविरुद्ध ताप्लेजुङमा निर्माणाधीन पाथीभरा केबलकारको विरोध गर्दै ‘नो केबलकार’ समूहले खाता बन्द गर्ने अभियान थालेपछि केन्द्रीय बैंकले आज आफ्नो धारणा सार्वजनिक गरेको हो ।
सम्बन्धित बैंकको नाम उल्लेख नगरी जारी गरिएको विज्ञप्तिमा केन्द्रीय बैंकबाट इजाजतपत्र प्राप्त ग्लोबल बैंकविरुद्ध हाल केही व्यक्ति/समूहले दिएको भ्रामक अभिव्यक्ति र दुष्प्रचारप्रति आफ्नो गम्भीर ध्यानाकर्षण भएको उल्लेख छ ।
विज्ञप्तिमा लेखिएको छ,- ‘बैंकिङ क्षेत्र अर्थव्यवस्थाको मेरुदण्ड हो । नेपालको अर्थतन्त्रको दिगो विकासमा सहयोग पुर्याउन मूल्य र शोधनान्तर स्थिरता कायम गर्दै समग्र बैंकिङ तथा वित्तीय क्षेत्रको स्थायित्व कायम गरी सर्वसाधारणको विश्वसनीयता अभिवृद्धि गर्न यस बैंकलाई कानुनले स्पष्ट जिम्मेवारी दिएको छ । सोहीबमोजिम सर्वसाधारणको निक्षेप पूर्ण रूपमा सुरक्षित रहेको व्यहोरा अनुरोध छ ।’
बैंकिङ जस्तो सम्वेदनशील क्षेत्रप्रति भ्रमित नपार्न र हल्लाको पछाडि नलाग्न सर्वसाधारणलाई अनुरोध गरिएको छ । लेखिएको छ, ‘सम्बद्ध लगानीकर्ता, निक्षेपकर्ता, ग्राहक तथा सरोकारवालालाई ढुक्कसँग नियमित रूपमा बैंकिङ कारोबार गर्न नेपाल राष्ट्र बैंक हार्दिक अनुरोध गर्दछ ।’ केन्द्रिय बैँकद्वारा जारी विज्ञप्तिमामा उल्लेख छ।
