वीरगन्ज भन्सार कार्यालयको तथ्यांकअनुसार गत आर्थिक वर्षको सोही अवधिको तुलनामा इन्धन आयातको मूल्य २५ अर्ब ५४ करोड रुपैयाँले बढेको छ। गत आवको वैशाखसम्म १ खर्ब ५६ अर्ब १७ करोड रुपैयाँ बराबरको पेट्रोलियम पदार्थ आयात भएको थियो।
आयात परिमाणका आधारमा डिजेल अझै पनि सबैभन्दा धेरै आयात हुने इन्धन बनेको छ। चालु आवको वैशाखसम्म ८ लाख ९५ हजार २ सय ४६ किलोलिटर डिजेल आयात हुँदा १ खर्ब ५७ करोड रुपैयाँ बाहिरिएको छ। गत आवको सोही अवधिमा ९ लाख ८ सय ५७ किलोलिटर डिजेल आयात हुँदा ७९ अर्ब ५७ करोड रुपैयाँ खर्चिएको थियो। परिमाण केही घटे पनि मूल्य उल्लेख्य रूपमा बढेको देखिएको छ।
यस्तै पेट्रोल आयात भने बढेको छ। चालु आवको वैशाखसम्म ३ लाख ९० हजार ६ सय १५ किलोलिटर पेट्रोल आयात हुँदा ३५ अर्ब ७९ करोड रुपैयाँ खर्च भएको छ। गत आवको सोही अवधिमा ३ लाख ६७ हजार ३ सय ४४ किलोलिटर पेट्रोल आयात हुँदा ३१ अर्ब ७१ करोड रुपैयाँ बाहिरिएको थियो।
खाना पकाउने ग्यासका रूपमा प्रयोग हुने एलपीजीको आयात भने घटेको छ। चालु आवको वैशाखसम्म २४ करोड २७ लाख किलो एलपीजी आयात हुँदा २५ अर्ब ५४ करोड रुपैयाँ खर्चिएको छ। गत आवको सोही अवधिमा २६ करोड ४१ लाख किलो एलपीजी आयात हुँदा ३० अर्ब २८ करोड रुपैयाँ बराबरको विदेशी मुद्रा बाहिरिएको थियो।
