काठमाडौं । चीनका लागि नेपालका पूर्वराजदूतहरुले संवेदनशील र प्रभावकारी परराष्ट्र नीति अपनाउन सरकारलाई अपिल गरेका छन् ।
नेपाल–चीन दौत्य सम्बन्ध ७० वर्ष पुगेको उपलक्ष्यमा चीनका लागि नेपालका पूर्वराजदूतहरु राजेश्वर आचार्य, महेन्द्र पाण्डे, टंक कार्की, महेश मास्के, लीलामणि पौडेल, विष्णु पुकार श्रेष्ठ र कृष्ण प्रसाद ओलीले संयुक्त विज्ञप्ति जारी गर्दै सरकारलाई यस्ताे आग्रह गरेका हुन् ।
नेपालको लिपुलेक हुँदै भारतले चीनको मानसरोबरसम्म पुग्ने बाटो खोलेको सन्दर्भमा उनीहरुको सो अपिल सार्वजनिक भएको हो ।
नेपाल र चीनको युगौँ पुरानो मैत्री सम्बन्धलाई अहिलेको जटिल भू–राजनैतिक चुनौतीकाबिच कसरी अझ प्रगाढ बनाउन सकिन्छ भन्नेबारेमा छलफलपछि जारी वक्तव्यमा नेपालले सधैँ एक चीन नीति दृढतापूर्वक पालना गरेको छ र नेपालको भूमि कुनै पनि मित्रशक्ति विरुद्ध प्रयोग हुन् नदिने नेपाल सरकारले लिँदै आएको अविचलित प्रतिबद्धता स्मरण गरेका छन् ।
नेपालले हिजो जारी गरेको वक्तव्यको सह्राना गर्दै उनीहरुले आफ्नो सार्वभौम सीमा रक्षाका लागि अविलम्व कूटनीतिक पहल गर्न सराकारको ध्यानाकर्षण समेत गराएका छन् । ‘साथै वर्तमान द्वन्द्वग्रस्त विश्व राजनीतिक, कूटनीतिक परिस्थिति, मध्यपूर्वमा देखिएको द्वन्द्व र त्यसले नेपाललाई पारेको प्रत्यक्ष र परोक्ष असरबारे गहिरो चिन्ता र चासो समेत व्यक्त गर्दै नेपाल सरकारले संवेदनशील र प्रभावकारी परराष्ट्रनीति अपनाउने विश्वास पनि व्यक्त गर्दछौं’, उनीहरुले भनेका छन् ।
अहिलेको विश्व परिवेशमा नेपाल र चीन बीच भएका बिआरआई लगायतका सबै आर्थिक, संस्कृतिक, शैक्षिक र विकास परियोजनाहरुको शीघ्र कार्यान्वयन र सन्चालन गर्न नेपाल दृढतापूर्वक अघि बढ्नुपर्छ भन्ने उनीहरुको साझा मत छ ।
पूर्वराजदूतहरुले पञ्चशीलका आधारमा विकसित हुँदै आएको हाम्रा दुई देशको सम्बन्धलाई नयाँ उचाइमा पुर्याउन नयाँ सरकार प्रयत्नशील रहनेछ भन्ने विश्वास व्यक्त समेत गरेका छन् ।
‘मित्र राष्ट्र चीनले नेपालको आर्थिक, सामाजिक, सांस्कृतिक, पूर्वाधार विकाश लगायतका क्षेत्रमा सदैव उदारतापूर्वक गरेको सहयोगको उच्च मूल्याङ्कन गर्दै र नेपालले पनि मित्र राष्ट्र चीनलाई दिएको राजनीतिक एवं कूटनीतिक सहयोग एवं समर्थनको स्मरण गर्दै पञ्चशीलका आधारमा विकसित हुँदै आएको हाम्रा दुई देशको सम्बन्धलाई नयाँ उचाइमा पुर्याउन नयाँ सरकार प्रयत्नशील रहनेछ भन्ने हाम्रो विश्वास रहेको छ,’ उनीहरुले जारी गरेको अपिलमा लेखिएको छ ।
